احتساب عدالت نا جج محمد ارشد ملک نا خذمت آتے لاہور ہائی کورٹ ءِ پدی تننگانے، بنجائی وزیر کانود و انصاف بیرسٹر فروغ نسیم نا پریس کانفرنس
اسلام آباد ۔ 12جولائی (اے پی پی) بنجائی وزیر کانود و انصاف بیرسٹر فروغ نسیم پارینے کہ وزارت کانود احتساب عدالت نا جج محمد ارشد ملک ءِ ویڈیو و پریس ریلیز نا بنا آ پین کاریم کننگ آن تورسا اونا خذمت آتے لاہور ہائی کورٹ ءِ پدی تننگانے ، جج ارشد ملک تیناحلقی بیان اٹی پارے کہ او خوف و لالچ آن بیدس فیصلہ تس ۔ اودے رشوت نا سلہ ہم خلنگاسس، بیان حلقی ءِ ہُننگے تو لگک کہ جج صاحب فیصلہ آ میرٹ کرے، نواز شریف ءِ اسہ مقدمہ سے ٹی سزا و ایلو ٹی بری کننگا ، جج ءِ رشوت یا دھڑکوتننگ نا بابت ہم سزا ارے، جج ءِ کاریم آن توننگ آ اونا فیصلہ غاتیا ہچ ءُ پرخ اس تمپک ، اسلام آباد ہائی کورٹ نواز شریف نا زیر سماعت اپیل آ فیصلہ کروئی ءِ، وزیراعظم و ساڑی حکومت آئین، کانود وانصاف تون سلوک ءِ، عدالت آتے دباءو ٹی اتنگ نا ہرگز موکل تفننگک ۔ اوداخیال آتا درشانی ءِ جمعہ نا دے آ خصوصی کمکار شہزاد اکبر تون اوار پریس کانفرنس آن تران کرسا کرے ۔ بیرسٹر فروغ نسیم پارے کہ اسلام آباد ہائی کورٹ احتساب عدالت نا جج محمد ارشد ملک نا خذمت آتے پدی کننگ نا بابت مراسلہ اس مون تسوسس ہرانا خوڑتی اٹ جاچ ءِ ہلنگانے ۔ فروغ نسیم پارے کہ وزارت کانود محمد ارشد ملک ءِ پین کاریم کننگ آن تورسا اونا خذمت آتے لاہور ہائی کورٹ ءِ واپس کرینے ۔ اوپارے کہ احتساب عدالت نا جج ارشد ملک نا کنڈآن جاری کروک پریس ریلیز و بیان حلفی ءِ ہُننگ آن پد معلوم مریک کہ ہراتم آن او جج تعینات مس چندی بندغ آک اودے رشوت و دھڑکو تننگ نا کوشست کرسا کریر، بیان حلفی نا رداٹ مدینہ منورہ ٹی ہم اوڑدہی کننگا ۔ اگہ بیان حلفی ءِ ہُننگے تو جج فیصلہ میرٹ آ کرینے ۔ اوپارے کہ نیب کانود نا رداٹ جج ءِ دھڑو تننگ و مرضی نا فیصلہ ہلنگ نا کوشست کننگ نا 10سال سزا جتا ءِ ۔ اوپارے کہ ہندا کیس ءِ ساڑی آحکومت جوڑ کتنے، احتساب عدالت نا جج تینا سمجھ نا رداٹ دوبہ دار ءِ اسہ کیس اسے ٹی بری کرے وخت اس کہ ایلو ٹی سزا تس ۔
