اسلام آباد ۔ 12جولائی (اے پی پی) وزیراعظم عمران خان پارینے کہ حکومت درملکی زرکاری ءِ مون آ دننگ و کاروبار اٹی آسانی ودی کننگ آ خصوصی چکار کننگ ءِ ، سی پیک ڈٹ انا رداٹ چندی بشخ آتے ٹی پک مروک ڈٹ آتے عملی دروشم اس تننگ اولیت ءِ ۔ اوداہیت ءِ جمعہ نادے آ چینی کاروباری برادری نا ڈل اتون اوڑدہی ٹی گپ و تران کرسا پارے ۔ ڈل اٹی 55آن زیات جتا کمپنی تا سروک آک اوار ئسر ۔ اوڑدہی ٹی سلاہکار خزانہ ڈاکٹر عبدالحفیظ شیخ ، سلاہکار واپار عبدالرزاق داءود، وزیر ڈٹ بندی مخدوم خسروبختیار، چیئرمین زرکاری بورڈ زبیر گیلانی ، چیئرمین ایف بی آر شبر زیدی و ایلوفک ساڑی ئسر ۔ پاکستان اٹی چین نا سفیر ہم اوڑدہی ٹی ساڑی ئس ۔ دا اوڑدہی وزیراعظم عمران خان نا دورہ چین اٹی جتا بشخ آتے ٹی ہڑتوم آ کنڈآتا کمکاری ءِ پین مون آ دننگ نا معاہدہ ءِ عملی دروشم اس تننگ نا چرجوئی نا کڑی اسے ۔ چندی صنعت و شعبہ غاتیان تعلق تخوک آ چینی کمپنی تا سروک آتا کنڈآن پاکستان اٹی بروک آ مسٹ آن پنچ سال اٹی پنچ ارب ڈالر آن زیات نا زرکاری کننگ نا باوری کرفنگا ۔ سمال و میڈیم بشخ آن تعلق تخوک آ چینی کمپنی تا کنڈآن زرکاری کننگ و انڈسٹری پاکستان آ گدریفنگ اٹ است خواہی نا درشانی ءِ کننگا ۔ چینی کمپنی تا کنڈآن زرکاری و انڈسٹری نا گدریفنگ اٹ اولیکو سال پنجا ہزار آن زیات نوکری تا وارخواہی ودی مریک ۔ داوخت آ گپ و تران کرسا وزیراعظم پارے کہ پاکستان و چین نا الس سنگتی نا سوگو بندھن اٹ بندوک ءُ ۔ چین ہر مشکل وخت اٹی پاکستان تون ساتھ تسنے ۔ اوپارے کہ چین نا سرکڑدہ نا وژن و تدبر خاص کر امن و شونداری، گورننس و الس ءِ نیزگاری آن کشنگ نا حکمت عملی آن زہمی ءِ ۔ چین نا آزموندہ غاتیان فائدہ ہرفنگ خوانہ ۔ وزیراعظم پارے کہ سی پیک ڈٹ پاکستان چین سنگتی ءِ پین سوگو کننگ وہڑتوم آ ملک آتا نیام اٹ واپاری تعلقداری تا وارخواہی تیان پبی فائدہ ہرفنگ نا رداٹ گیم چینجر اس ثابت مریک ۔ اوپارے کہ سی پیک ڈٹ انا رداٹ چندی بشخ آتے ٹی پک مروک ڈٹ آتے عملی دروشم اس تننگ اولیت ءِ ۔ وزیراعظم پارے کہ سی پیک ڈٹ آتیا وخت آ عملدرآمد کن وزارت ڈٹ بندی ٹی خصوصی بشخ اس جوڑ کرینن تانکہ دا ڈٹ آتا بے اڑاند پیش رفت ءِ المی کننگ مرے ۔ حکومت درملکی زرکاری ءِ مون آ دننگ و کاروباراٹی آسانی ودی کننگ آ خصوصی چکار کننگ ءِ ۔ چینی سفیر ڈل اٹی اوار چندی چینی کمپنی تا کنڈآن پاکستان اٹی زرکاری نا وارخواہی و چینی کمپنی تا است خواہی ءِ تالان کرے ۔ چینی سفیر پارے کہ ساڑی حکومت نا دور اٹی زرکاری ءِ مون آ دننگ و درملکی کمپنی تے کاروبار اٹی آسراتی تننگ نا رداٹ پیدوار پیش رفت و عزم نظر بسنے ۔ اوپارے کہ سوگو، شونہال و پوسکن آ پاکستان نا عزم ءِ عملی ءُ دروشم اس تننگ، صنعتی بشخ و کاروباری سرجزآتامون آ دننگ اٹ چین نا حکومت ہروڑکمک فراوان کیک ۔ وزیر ڈٹ بندی مخدوم خسروبختیار و سلاہکار واپار عبدالرزاق داءود حکومت نا واپاری پالیسی و خاص کر سی پیک ڈٹ آتا بابت کروک آ گام گیج آتیان بشخ ہلوک آتے معلومدار کرے ۔
