اسلام آباد۔ 10جولائی (اے پی پی) الیکشن کمیشن آف پاکستان مچ آ ملک اٹی فارم 45نا غیب مننگ نا دعویٰ ءِ بے بنداو و راستکی تیان چپ گوندسا پارینے کہ فارم 45، 46، 48و 49 الیکشن کمیشن نا ویب سائٹ آ ساڑی ءُ۔ چارشنبے نادے آ داڑے جاری بیان اٹی ترجمان الیکشن کمیشن پارے کہ پی پی پی نا چیئرمین بلاول بھٹو زرداری نا ڈیرہ اسماعیل خان اٹی جلسہ غان تران کرسا دا پاننگ ”کہ عمران خان تو بیرہ 4حلقہ غاتیا سوج کریسس، 2018ء نا الیکشن اٹی تو مچ آ پاکستان آن فارم 45غیب ئس“ راست اف۔ ترجمان پارے کہ الیکشن ایکٹ مجریہ 2017ء نا سیکشن 95(10) نا رداٹ الیکشن کمیشن گچین کاری تا 14دے انا تہہ ٹی فارم 45، 46، 48و 49 السی معائنہ کن تیناویب سائٹ آ شاغوئی مریک ہراکانود نا رداٹ الیکشن کمیشن تینا ویب سائٹ www.ecp.gov.pk آ شاغاسس ہرا اینو ہم الیکشن کمیشن نا ویب سائٹ آ ہُننگ مریک۔ ترجمان پارے کہ دا پاننگ کہ فارم 45مچ آ ملک آن غیب ءِ بالکل غلط ءِ و داہیت اٹی ہچ ءُ راستکی اس اف۔
