اے این ایف نا کارکڑد آ گمرءِ، ادارہ ٹی وسیلہ غاتا کمتی ءِ پورو کننگک
اسلام آباد۔ 10 جولائی (اے پی پی) وزیر انسداد منشیات شہریارآفریدی پارینے کہ انسداد منشیات فورس اے این ایف نا کارکڑد آ گمر ءِ، اے این ایف اٹی وسیلہ غاتا کمتی ءِ پورو کننگک، منشیات نا برخلاف کارروائی تے ترند کننگک، اسٹ اس ہم کانود آن بایدے ایڑتر مف، انسداد منشیات کن سخت کانود سازی نا بناءِ کننگانے۔ داخیال آتا درشانی ءِ او چارشنبے نادے آ اے این ایف ہیڈ کوارٹرز نا دورہ نا وخت آ گپ و تران کرسا کرے۔ داوخت آ ڈی جی اے این ایف میجر جنرل محمد عارف وزیر انسداد منشیات ءِ اے این ایف نا امور و کارکڑد آ حوال تس۔ اوپارے کہ منشیات نا برخلاف 2019ء ٹی اے این ایف نا کارکڑد مثالی ءِ۔ وزیر انسداد منشیات شہریار آفریدی پارے کہ اے این ایف نا کارکڑدگی آ گمر ءِ، وسیلہ غاتا کمتی ءِ پورو کننگک، اے این ایف منشیات نا برخلاف دنیا نا گچین انگا فورس مریک۔ اوپارے کہ ہچ کس کانود آن ایڑتربایدے مف۔ کانود اہزگار و نیزگار غٹ آ بریبر لاگو مریک، انسداد منشیات کن کارروائی تے ترند کننگک، داناسور ءِ تالان کروک آتے بشخنگپک و غٹ انا برخلاف اسہ ہی کانود اس مریک۔ اوپارے کہ منشیات نا سمگلنگ نا برخلاف سخت کانودسازی نابناءِ کرینن، ہندن ءُ کانود اس کینہ کہ منشیات نا توننگ المی مننگ کے، کانودسازی ٹی سخت ءُ سزا تخنگک، قوم ءِ نسخان تروک آتیا رحم کننگپک۔ حوال اٹی وزیر انسداد منشیات ءِ پاننگاکہ تدوک آ سال 368میٹرک ٹن منشیات ہلنگا ہراکہ دنیا ٹی غٹ آن زیات مقدار ءِ ہرادے فورس اس ہلکونے ہرانا مالیت 565ملین ڈالر ءِ۔
