حکومت بدعنوانی نا انسدادو نیزگاری نا چٹفنگ کن کیہی گام گیج کننگ ءِ، تعلیم و جان جوڑی نا گچینی، وڈی خوری و نیزگاری نا چٹفنگ بھلو بدلی اسے ءُ
اسلام آباد۔ 10 جولائی (اے پی پی) صدر مملکت ڈاکٹر عارف علوی پارینے کہ غریبی و بدعنوانی نا براہ راست تعلق ءِ، حکومت بدعنوانی نا انسداد و غریبی نا چٹفنگ کن کیہی گام گیج کننگ ءِ، تعلیم و جان جوڑی نا گچینی، کرپشن و غریبی نا چٹفنگ بھلو چینجز ءُ، ودوک آ آبادی ہم غریبی ٹی ودکی نا بھلا سوب ءِ، خلقت ءِ بنداوی آسراتی تا فراوانی آن ہی پوسکن آ پاکستان ءِ جوڑ کننگ مریک، احساس پروگرام نیزگاری نا چٹفنگ اٹ کمکار مریک۔ داخیال آتا درشانی ءِ او چارشنبے نادے آ داڑے نیزگاری نا چٹفنگ نا بابت اسہ دے ئی سیمینار آن تران کرسا کرے۔ صدر مملکت پارے کہ مستین اٹی نیزگاری تون اوار بھلا ویل آتے اولیتی بنداو تیا ایسر کننگ تنے۔ بدعنوانی نا نیزگاری تون براہ راست تعلق ءِ۔ الس ءِ نیزگاری آن کشسا راج انا کاریمی ءُ شاری کننگ مریک۔ خلقت نا بھلو کچ اسے نیزگاری نا گواچی خنسا دکھ مریک۔ صدر چندی قرآنی آیت و حدیث آتا حوالہ ءِ ترسا پارے کہ اسلامی تعلیمات آتے ٹی نزور تپہ غاتا شرحالی آ خصوصی چکار کننگانے۔ اسلام اٹی بیت المال نا مسخت ہم نیزگاری نا چٹفنگ ءِ۔ اوپارے کہ نیزگاری نا چٹفنگ کن حکومت ہرااحساس پروگرام نا بناءِ کرینے او بھاز اہمیت تخک داٹی راج انا پسماندہ تپہ، بے روزگار و نیزگار انگا بندغ آتیا چکار کننگانے تانکہ اوفتے اوفتا نت تیا سلفسا راج انا فعال شاری اس جوڑ کننگ مرے انتئے کہ نزور و اختہ مروک آ تپہ غاتا شرحالی ریاست نا زمواری مریک۔ صدر پارے کہ پاکستان خیرات تروک آ ملک آتے ٹی اولیکو نمبرآٹے، اسلام اٹی نماز و روچہ تون اوار اوار حقوق العباد آہم زور شاغنگانے۔ قرآن پاک اٹی ہم صدقہ و خیرات نا تلقین کننگانے، وزیراعظم عمران خان ہم تعلیم و جان جوڑی و ایلو ویل آتا ایسری نا عزم کرینے و اودا رداٹ کیہی پروگرام تا بناءِ کرینے۔ اوپارے کہ ریاست نا دا زمواری ءِ کہ راج انا غٹ شاری تے بریبر وارخواہی فراوان کے، ملک اٹی چناتیٹی غذائی کاختی ہم اسہ ویل اسے، نیزگار و ہزگار آتا چناتے کن تعلیم نا بریبر وارخواہی فراوان کننگ المی ءِ۔ صدر”احساس پروگرام“ ءِ حکومت نا ستاکڑزوک گام گیج اس گوندسا پارینے کہ دا جتا ءُ حیثیت اس تخوک ءُ پروگرام اسے، حکومت احساس پروگرام نا فنڈ ءِ ہم دگناکرینے۔ صدر دا پروگرام نا بابت ڈاکٹر ثانیہ نشتر نا کوشست آتا ہم ستاءِ کرے۔ اوپارے کہ ننے معلومداری و رابطہ غاتا گیشتر نظام ءِ تینا کننگ نا گرج ءِ۔ و دا چرجوئی ٹی اسلامی نظریاتی کونسل ءِ ہم پارینے کہ او راہشونی ءِ کے و مسیت آتا کمک اٹ ہم دا بابت خلقت ءِ آگاہی فراوان کننگ مریک۔ رائے عامہ جوڑ کننگ اٹ پارلیمنٹ و میڈیا نا بھاز اہم ءُ کڑد اسے۔ اوپارے کہ خلقت ءِ بنداوی آسراتی تا فراوانی آن ہی پوسکن آ پاکستان ءِ جوڑ کننگ مریک۔ داکان مست سمینار آن وزیراعظم نا خصوصی کمکار راجی رکھ ڈاکٹر ثانیہ نشتر تران کرسا پارے کہ حکومت کفایت شعاری نا پالیسی آ عمل کننگ ءِ۔ نیزگاری نا چٹفنگ کن گچین گام گیج کننگ انگ ءِ و احساس پروگرام اٹی 28 وزارت بشخ ہلنگ ءُ و دا نیزگاری نا چٹفنگ کن جتا ءُ پروگرام اسے۔ بجٹ اٹی احساس پروگرام کن خصوصی فنڈ جتا کننگانے و راجی بشخ انا فنڈ آتے دگنا کننگانے۔
