اسلام آباد ۔ 9 جولائی (اے پی پی) مزن وزیر عمران خان ءَ گوں پروفیسر ڈاکٹر عطاء الرحمن ءَ سئے شمبے ءِ روچ ءَ مزن وزیر کارگس ءَ گند ءُُ نند کت ۔ ڈاکٹر عطاء الرحمن ءَ مزن وزیر گس ءِ اندر ءَ جوڑ بوھوکیں یونیورسٹی آف انجینئرنگ اینڈ ایمرجنگ ٹیکنالوجیز ءِ پروجیکٹ ءِ بابت ءَ ھیال ریچی کت ۔ مزن وزیر ءَ را گوشگ بوت کہ یونیورسٹی ءِ شش بھر جوڑ کنگ بیت ایشانی تہ ءَ وت جوڑیشتی بلدکاری ، ھاٹیگ ، بائیو ٹیکنالوجی ءُُ میٹریل سائنسز ءِ بنجاھ ھوار انت ۔ پروفیسر ڈاکٹر عطاء الرحمن ءَ مزن وزیر ءِ گوما بنجاھی دارالحکومت ءُُ چاریں صوبائی دارالحکومت آنی تہ ءَ پنچ گیش بنجاھ ءِ برجائی ءِ شور ءُُ سلاھ ءِ بابت ءَ ھیال ریچی کت ۔ گند ءُُ نند ءَ ملک ءَ پٹ ءُُ پول کاری ءِ دیمروئی ءِ واستہ ریسرچ فنڈنگ ءِ شور ءُُ سلاھ آنی سر ءَ ھم چار ءُُ بچار کنگ بوت ۔
