کوءٹہ ۔ 09 جولائی (اے پی پی) ترجمان حکومت بلوچستان لیاقت شاہوانی پارینے کہ چیئرمین سینیٹ محمد صادق سنجرانی جوان وڑاٹ ایوان بالا نا کارروائی ءِ چلیفینے ہرانا مستین اٹی مٹ ملیپک، چیئرمین سینیٹ محمد صادق سنجرانی ءِ اینک کننگ آن بلوچستان اٹی احساس محرومی ودنگ تون بنجا و چنکا صوبہ غاتا نیام اٹ مری ودی مریک، اپوزیشن جماعت آک ملک و قوم انا زیات تر فائدہ غاتے ٹی چیئرمین سینیٹ نا برخلاف تحریک بے پت نا فیصلہ ءِ پدی ہلیر، سے شنبے نادے آ وزیراعلیٰ ہاءوس آن جاری کروک بیان نارداٹ ترجمان صوبائی حکومت لیاقت شاہوانی پارینے کہ مستین نا حکومت آک بلوچستان تون ہرانا انصافی تے کریر او ہچ کس آن ڈکوک افس و داسہ ہراتم بلوچستان ءِ اولیکو وار چیئرمین سینیٹ نا عہدہ ملانے تو اپوزیشن جماعت آک اودے پلنگ نا سازش کرسا بنجا و بلوچستان نا نیام اٹ مری ودی کننگ ءُ ہراکہ نیگ شگون اف، اوپارے کہ چیئرمین سینیٹ محمد صادق سنجرانی ءِ اینک کننگ آن بلوچستان اٹی احساس محرومی ودک، بطور چیئرمین سینیٹ محمد صادق سنجرانی ایوان بالا ءِ مدام بے کنڈ ہلوک مرسا چلیفے ہرانا برملا درشانی ءِ اپوزیشن نا کیہی جماعت آتا سینیٹر آک تینٹ کرینو ہنداخاطران اپوزیشن جماعت آک چیئرمین سینیٹ ءِ اینک کننگ کون آ نان ایشو نا جاگہ غا ملکی معیشت ءِ مون تروک چیلنج و ایلو ویل آتیا چکار کیر ۔
