اسلام آباد ۔ 09 جولائی (اے پی پی) صدر مملکت ڈاکٹر عارف علوی پارینے کہ جاپان پاکستان نا خڑکی دوست ملک و اہم اقتصادی شریدار ءِ، پاکستان تینامعیشت نا غٹ بشخ آتے ٹی زرکاری کن جاپانی زرکارآتے ہروڑنا آسراتی فراوان کیک ۔ داخیال آتا درشانی ءِ او جاپان کن پاکستان نا پندار سفیر امتیاز احمد تون گپ و تران کرسا کرے ہراسے شنبے نادے آ داڑے ایوان صدر اٹی اوڑتون اوڑدہی کرے ۔ صدر مملکت جاپان کن پندار سفیر ءِ اونا تعیناتی آ مبارکبادی ترسا پارے کہ پاکستان و جاپان نا نیام اٹ تعلقداریک پین زیات مننگ ءُ ولے داچرجوئی ٹی حقی کچ و لاءخی آن فائدہ ہرفنگ کن غٹ کوشست آتے کاریم اٹ اتنگ نا گرجءِ ۔ اوپندار سفیر آ زور شاغا کہ او ہڑتوم آ تا الس نا تین پہ تینی فائدہ غاتے ٹی دا تعلقداری تے پین مون آ دننگ کن پبی کوشست کے ۔ اوپاکستان نا کسب کار و نیم کسب کار افرادی قوت ءِ جاپان اٹی گمان آتا پٹنگ نا گرج آ ہم زور شاغا ۔ صدر مملکت پندار سفیر نا جاپان اٹی سرسہب قیام کن نیک است خواہی و دا اومیت نا درشانی ءِ کرے کہ اونا تعیناتی نا وخت اٹی ہڑتوم آ ملک آتا نیام اٹ ہڑتوم آ کنڈآتا تعلقداریک پین سوگو مریرہ ۔
