اسلام آباد۔ 08 جولائی (اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ وزیراعظم عمران خان نا ویژن و کفایت شعاری مہم ءِ مون آ تخسا غٹ ادارہ غاتے ٹی حق ءِ حقدار اسکان سرکننگ و بے المی خڑچ آتاتوننگ کن گام گیج چست کننگ انگ ءِ، پی ٹی وی نا چیلنج آتے وارخواہی تیٹی بدلیفنگ کن غٹ اسٹیک ہولڈر آتا مخ تفی المی ءِ۔ سلابت و امنائی اتون اسہ روڈ میپ اس تیار کننگک، پی ٹی وی نا تدوک آ مالی سال کٹیا ٹی ہِننگ ستاکڑزک، پی ٹی وی ٹی رولز اینڈ ریگولیشنز ءِ مون آ تخسا گام گیج چست کننگک۔ اودوشنبے نادے آ پی ٹی وی ہیڈکوارٹرز اٹی پنشنرز آتے چیک بشخ وپانٹ کننگ نا دود آن تران کریکہ۔ سیکرٹری وزارت حوالکاری و شینکاری زاہدہ پروین، چیئرمین پی ٹی وی ارشد خان، ایم ڈی پی ٹی وی عامر منظور، پی آئی او طاہر خوشنود و پی ٹی وی یونین نا عہدیدار آک دود اٹی ساڑی ئسر۔ وزیراعظم نا خصوصی کمکار ڈاکٹر فردوس عاشق اعوان پی ٹی وی نا ریٹائرڈ ملازم آتے ٹی 85کروڑ روپئی نا چیک بشخ وپانٹ کرے۔ دود آن تران کرسا وزیراعظم نا خصوصی کمکار ڈاکٹر فردوس عاشق اعوان پارے کہ حق دار تے اوفتا حق ءِ تننگ تحریک انصاف نا حکومت نامنشور ءِ۔ اوپارے کہ پی ٹی وی میڈیا نا اسہ بھاز بھلو ادارہ اسے، پی ٹی وی نا خبر تا بابت تینا اسہ جتا ءُ شناخت اسے۔ اوپارے کہ چندی گام گیج تا کمک اٹ پی ٹی وی ءِ ویل آتیان کشنگ انگ ءِ، پی ٹی وی ٹی سرکڑدہ ہی نا کمتی ئس ہرادے پورو کننگانے، پی ٹی وی نا اصل وارث اونا ورکرزآک ءُ، ہراوخت اسکان وارث تینا اُراءِ بچفنگ کن گام گیج کپک اُرابچپک، بدبختی اٹ ویل آتا سوب مربوط رابطہ غاتا کمتی ئس۔ ڈاکٹر فردوس عاشق اعوان پارے کہ مستین اٹی ادارہ غاتے گچین کننگ نا سوچ اسہ ایلو اسکان سرمننگ کتو ولے ساڑی حکومت پی ٹی وی ءِ گچین کننگ کن ہروڑنا گام گیج چست کننگ ءِ۔ اوپارے کہ ادارہ ٹی اصلاحات کن یونین ءِ ہم اوار کننگانے۔ پی ٹی وی نا عظمت رفتہ ءِ بحال کننگ کن غٹ کڑد ادا کننگ ءُ۔ اوپارے کہ پی ٹی وی نا کوڈ آف کنڈکٹ ءِ گچین کننگ کن اصلاحات اتنگ اُن۔ پی ٹی وی ٹی اصلاحات اتسا سرسہبی اٹ چلیفنگ چیلنج اسے۔ اوپنشنر آتے اوفتا حق ملنگ آ مبارکباد پیش کرے۔
