مقبوضہ کشمیر اٹی برہان وانی نا آجوئی نا جوزہ اینو ہم زندہ ءِ، ورناراہشون نا مسٹ میکو کزیہ دے انا وخت آمقبوضہ دامان اٹی پورو ہڑتال مس، ترجمان دفترخارجہ نا ٹویٹ

اسلام آباد۔ 08 جولائی (اے پی پی) دفترخارجہ نا ترجمان ڈاکٹر محمد فیصل پارینے کہ بھارتی مقبوضہ کشمیر اٹی برہان وانی نا آجوئی نا جوزہ اینو ہم زندہ ءِ، مقبوضہ دامان اٹی ورناکشمیری راہشون نا شہیدی نا مسٹ میکو کزیہ دے انا وخت آ پورو شٹر ڈاؤن مس۔ دوشنبے نادے آ تینا اسہ ٹویٹ اسے ٹی ترجمان دفترخارجہ پارے کہ بھارتی بیدادی آن پد ہم مقبوضہ کشمیر اٹی حق خودارادیت نا جہد برجاءِ۔ بھارتی تسلط نا برخلاف جہد اٹی تینا جان ءِ ندر کروک آ کشمیری ورنابرہان وانی نا کزیہ دے انا وخت آ ”کشمیر بلیڈز“ہیش ٹیگ اتون تینا ٹویٹ اٹی دفترخارجہ نا ترجمان پارے کہ مقبوضہ کشمیر اٹی بھارت نا کنڈآن کشمیری تا توار ءِ توننگ کن بیدادی نا واقعہ غاک ودانو۔ بھارت نا ٹی وی چینل زی نیوز ہم پک کرینے کہ برہان وانی نا کزیہ دے انا وخت آ سیکورٹی فورس آتا ودکی نفری اس تعینات کننگ آن بیدس کمامدارآک مقبوضہ کشمیر نا 4سویلی ضلع ٹی انٹرنیٹ سروس ءِ بند کرینے۔ جموں سرینگر ہائی وے آ سیکورٹی فورس آتا بھلو نفری اس تعینات کننگانے۔ دا ہائی وے مقبوضہ کشمیر نا مسہ سویلی ضلع کلگام، آننت ناگ و پلوامہ غان گدرینگک۔ یات سلے کہ دفترخارجہ نا ترجمان تدوک آ پنچ شنبے آ تینا ہفتہ وار پریس بریفنگ اٹی مقبوضہ وادی ٹی انسانی حق انا خلاف ورزی تا مذمت ءِ کریسس وپارے کہ مقبوضہ وادی نا الس آ بیدادی ءِ ودفنگانے۔ بھارت دنیا نا چکار ءِ بنداوی ویل آن اسہ کنڈ کننگ نا جاگہ غا اقوام متحدہ نا سلامتی کونسل نا قرارداد آتیا عملدرآمد کے۔