پاکستان و قازخستان نا نیام اٹ واپاری کچ و زرکاری ٹی ودکی نا گرج ءِ
اسلام آباد۔ 05جولائی (اے پی پی) وزیر خارجہ شاہ محمود قریشی پارینے کہ پاکستان و قازخستان نا نیام اٹ واپاری کچ و زرکاری ٹی ودکی نا گرج ءِ، پاکستان نا خڑک، نیام ایشیائی ریاست آتے ٹی قازخستان خاص اہمیت تخک۔ داہیت ءِ او پاکستان اٹی تعینات مروک آ قازخستان نا سفیر بارلی بے سادیکوف تون گپ و تران کرسا پارے ہرا جمعہ نادے آ وزارت خارجہ ٹی اوڑتون سپاروکی اوڑدہی کرے۔ اوڑدہی ٹی ہڑتوم آ کنڈآتا تعلقداری تے مون آ دننگ تون اوار تین پہ تینی است خواہی نا چندی معاملہ غاتیا گپ و تران کننگا۔ وزیر خارجہ پاکستان و قازخستان نا نیام اٹ ہڑتوم آ کنڈآتا تعلقداری تے ودفنگ نا چرجوئی ٹی، قازق سفیر نا خذمت آتا ستاءِ کرے و پارے کہ پاکستان نا خڑک، نیام ایشیائی ریاست آتے ٹی قازخستان اہمیت تخک۔
