پاکستان و ایران نا نیام اٹ واپاری و اقتصادی کمکاری ٹی ودکی نا بھاز گنجائش ارے
اسلام آباد۔ 05جولائی (اے پی پی) وزیراعظم عمران خان السی کہول آ ہن و بر و واپار تون اوار چندی بشخ آتے ٹی پاک ایران تعلقداری تے سوگوی تننگ نا عزم انا اعادہ ءِ کرسا پارینے کہ ہڑتوم آ ملک آتا نیام اٹ خاص کر واپاری و اقتصادی رابطہ غاتے ٹی ودکی نا بھاز زیات وارخواہی ارے۔ اوداہیت ءِ ایرانی وزیر صنعت، کانڑکنی و واپار رضارحمانی تون گپ وتران کرسا پارے ہرا جمعہ نادے آ وزیراعظم آفس اٹی اوڑتون اوڑدہی کرے۔ نائب وزیر کشت وکشار یزدان سیف، پارلیمنٹ نا باسک رمضان علی سبحانی، چیئرمین آئی سی سی آئی ایم اے سستان و بلوچستان صوبہ عبداللہ ریگی میر جاوا و پاکستان اٹی ایران نا سفیر مہدی ہنر دوست ئسک ہم اوڑتون اوار ئسر۔ وزیر بحری امور سید علی حیدر زیدی، سلاہکار واپار عبدالرزاق داؤد، چیئرمین زرکاری بورڈ زیبر گیلانی، سیکرٹری واپار احمد نواز سکھیرا ئسک ہم اوڑدہی ٹی ساڑی ئسر۔ہراٹی پاک ایران تعلقداری، ہڑتوم آ ملک آتا نیام اٹ واپاری وارخواہی تیان پبی فائدہ ہرفنگ نا بابت مروک آ پیش رفت نا بارواٹ گپ و تران کننگا۔ وزیراعظم ایرانی ڈل انا ستاءِ کرسا پارے کہ جغرافیائی قربت و خڑکی برادرانہ تعلقداری اسیجا تاریخ، دودوربیدگ و مذہب اٹی ءُ۔ وزیراعظم پارے کہ ہڑتوم آ ملک آتے سمگلنگ نا ویل ءِ ایسر کننگ و خاص کر پاک ایران سیم آ رہینگوک آ بندغ آتے زیات کاروباری وارخواہی فراوان کننگ کن ٹھوس گام گیج ہرفنگ نا گرج ءِ۔ ایرانی وزیر، وزیراعظم عمران خان ءِ ایرانی سرکڑدہ نا خیر سگالی جوزہ غاتیان معلومدار کرسا پارے کہ وزیراعظم عمران خان نا دورہ ایران آن ہڑتوم آ کنڈآتا تعلقداری خاص کر واپاری اقتصادی رابطہ کن کوشست آتا رفتار ترند مسنے۔ اوپاک ایران تین پہ تینی واپار نا مون آ دننگ نا کسر اٹ بروک آ اڑاند آتے مر کننگ کن پاک ایران اسیجا واپاری کمیٹی نا کنڈآن مروک آ پیش رفت آ است جمی نا درشانی ءِ کرے۔
