وزیراعظم نا خصوصی کمکار جان جوڑی ڈاکٹر ظفر مرزا نا پریس کانفرنس آن تران

اسلام آباد۔ 05جولائی (اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ جان جوڑی آسراتی پروگرام پاکستان نا تاریخ نا اسہ انقلابی و مثالی ءُ پروگرام اسے، وزیراعظم عمران خان نا وژن نا رداٹ الس ءِ جان جوڑی نا بنداوی آسراتی تا فراوانی ریاست نا اولی زمواری ءِ۔ جمعہ نادے آ پریس کانفرنس آن تران کرسا ڈاکٹر ظفر مرزا پارے کہ راجی رکھ انا دا گام گیج نا کمک اٹ نیزگاری نا لکیر آن شیف زند ءِ تیر کروک آ 15ملین نیزگار خاہوت آتے جان جوڑی نا انشورنس تننگ انگ ءِ۔ دافتیان پنجاب نا 36ضلع غاتا 6897000 نیزگار خاہوت، بلوچستان نا 32ضلع غاتا 515000خاہوت، سندھ انا 29 ضلع غاتا 3868316خاہوت و مچ آ تھر پارکر نا 300,000 خاہوت آک اوارو وخت اس کہ پختونخوانا 29 ضلع غاتا 1621088 خاہوت، آزاد جموں و کشمیر نا 11ضلع غاتا 335000 خاہوت، گلگت بلتستان نا 9 ضلع 126000خاہوت اوارو، وخت اس کہ خیبر پختونخوا ٹی اوار مروک آ 11ضلع غاتا اسہ لکھ خاہوت اوارو و اسلام آباد نا 85000خاہوت جان جوڑی کارڈ آن فائدہ ہرفرہ۔ اوپارے کہ جان جوڑی آسراتی پروگرام اٹی ہسپتال آتے ٹی داخل مروک آ مریض آتا طبی نگہداشت ءِ کوریج تننگانے، مریض آک ہرا مرض آتا درمان ءِ کرفنگ کیرہ اوفتے ٹی اوپن ہارٹ سرجری، سٹنٹس شاغنگ، ذیابطیس(شوگر) آن ودی مروک ویل و ویچڑ، عزوہ غاتا ویل مننگ نا درمان، کینسر نا درمان بشمول کیموتھراپی، ریڈیو تھراپی و سرجری اوارے۔ نیوروسرجیکل آپریشن آک غٹ سرجیکل وثانوی ناجوڑی، لمہ و چنا نا جان جوڑی تون تعلقدار میٹرنٹی پیکج و غٹ ایمرجنسیک اوارو، داٹی سالانہ وڑاٹ 720,000 روپئی نا انشورنس نا دنگ تننگانے۔ ڈاکٹر ظفرمرزا پارے کہ داوخت اسکان 3.24ملین خاہوت آتا اندراج ءِ کننگانے و 608233مریض ہسپتال آتا وزٹ ءِ کرینو۔ اوپارے کہ خاص انگا درمان کن 145000 آن زیات مریض آتے داخل کننگا وخت اس کہ 442005پوسکن آ خاہوت آتا پروگرام اٹی اندراج کننگانے۔ وزیراعظم نا پارت آ خیبر پختونخوا نا ضم مروک آ ضلع غاتا غٹ خاہوت آتے جان جوڑی انصاف کارڈ تننگک۔