وزیراعظم عمران خان نا وزیراعلیٰ پنجاب سردار عثمان بزدار تون گپ وتران

اسلام آباد۔ 04جولائی (اے پی پی) وزیراعظم عمران خان پارینے کہ معاشی حالیت آتے مون آتخسا حکومت مشکل ءُ فیصلہ کرے ہرافتا مسخت معیشت نا سمت ءِ سہی کننگ و ملک ءِ معاشی مشکل آتیان کشنگ نا ءِ، کاروباری برادری نا گڑتی تا پورو ادراک ءِ، خراج نا نظام آ کاروباری تپہ نا پت ءِ بحال کننگ کن ایف بی آر اٹی اصلاحات نا عمل برجاءِ تانکہ کاروباری برادری تون اوار غٹ تپہ تینٹ معاشی شونداری نا عمل اٹ بشخ دار مریر۔ اوداہیت ءِ وزیراعلیٰ پنجاب سردارعثمان بزدار تون گپ و تران کرسا پارے ہرافک پنچ شنبے نادے آ وزیراعظم آفس اٹی اوڑتون اوڑدہی کریر۔اوڑدہی ٹی وزیر ڈٹ بندی شونداری مخدوم خسرو بختیار، سلاہکار خزانہ ڈاکٹر عبدالحفیظ شیخ، سلاہکار واپار عبدالرزاق داؤد، صوبائی وزیر خزانہ مخدوم ہاشم جوان بخت، و صوبائی وزیر صنعت پنجاب میاں محمد اسلم و چیئرمین ایف بی آر شبر زیدی ئسک ہم ساڑی ئسر۔ اوڑدہی ٹی پنجاب اٹی صنعتی بشخ، کشت وکشار و سیل و سوات ءِ مون آ دننگ، خصوصی اقتصادی زون تا جوڑ کننگ و کاروباری تپہ ءِ مون تروک ویل آتا ایسری نا چرجوئی ٹی چست کروک آ گام گیج آتیا حوال تننگا۔ وزیراعظم پارے کہ نامساعد معاشی حالیت آتے ٹی حکومت بریبر بجٹ پیش کرینے ہراٹی صنعتی بشخ ءِ مون آ دننگ و نزور تپہ غاتا رکھ آ پورو چکار کننگانے۔ معاشی حالیت آتے مون آ تخسا حکومت مشکل ءُ فیصلہ کرے ہرافتا مسخت معیشت نا سمت ءِ سہی کننگ و ملک ءِ معاشی مشکل آتیان کشنگ نا ءِ۔وزیراعظم پارے کہ کاروباری برادری نا گڑتی تا ادراک ءِ۔ خراج نا نظام آ کاروباری تپہ نا پت ءِ بحال کننگ کن ایف بی آر اٹی اصلاحات نا عمل برجاءِ تانکہ کاروباری برادری تون اوار غٹ تپہ تینٹ معاشی شونداری نا عمل اٹی حصہ دار مریر۔وزیراعظم چیئرمین ایف بی آر تون اوار معاشی ٹیم ءِ چندی کاروباری تنظیم آتون اوڑدہی کننگ و معاشی و خراج نظام اٹی اصلاحات آن سرجم وڑاٹ معلومدار کننگ نا پارت کرے۔ اوپارے کہ کاروباری تپہ ءِ داباور کرفنگے کہ دا اصلاحات آتا مسخت ملک انا اقتصادی شونداری، ریونیو نظام نا گچینی و کاروباری تپہ غاتا است بڈی ءِ۔