وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا ”اے پی پی“ تون خصوصی گپ و تران

اسلام آباد۔ 04جولائی (اے پی پی) وزیراعظم نا خصوصی کمکارحوالکاری و شین کاری ڈاکٹر فردوس عاشق اعوان الس ءِ گچین سفری آسراتی تا فراوانی کن پوسکن آ ٹرین تا جاری کننگ آ وزیرریلوے شیخ رشید احمد ءِ مبارکبادی ترسا پارے کہ او الس نا مشکل آتے پہہ مرسا اوفتا چٹفنگ کن دے و نن خواری کننگ ءِ تانکہ ریلوے مسافر آتے آسان و گچین آسراتی دوئی مرے، شیخ رشید احمد نا کماشی ٹی جم اٹنگا نسخان نا مون ءِ توننگک، احساس پروگرام نا رداٹ ریلوے اسٹیشن تیا 1 ہزار اسٹالز آتا فراوانی ستاکڑزک داڑان زالبول ءِ ہم بریبری کاروباری وارخواہی دوبریک۔ او پنچ شنبے نادے آ اے پی پی تون خصوصی گپ و تران کریکہ۔ وزیراعظم نا خصوصی کمکار ڈاکٹر فردوس عاشق اعوان پارے کہ 2017و 2018 ء ٹی ریلوے نا نسخان 36ارب ئس ہرا 4ارب کم مرسا 32ارب سلیسونے و اومیت ظاہر کرے کہ شیخ رشید نا کماشی ٹی نسخان ءِ زوت پین کم مریک۔ اونا پاننگ ئس کہ ریلوے نظام اٹی سد درسد شفافیت مریک تو ریلوے زوت تینا نسخان آن پیش تمک۔ اوپارے کہ شیخ رشید نا بننگ آن پاکستان ریلوے آ خلقت نا پت زیات مسنے و مسافر آتا کچ مست آن 6لکھ ودانے۔ مچ آ دنیا ٹی ریلوے اسٹیشن آک معاشی شونداری ٹی اہم ءُ کڑد اس ادا کیرہ۔ پاکستان اٹی ہم ریلوے زوت نسخان آن پیش تمسا ملکی شونداری ٹی اہم ءُ کڑد اس ادا کیک۔ اوپارے کہ ریلوے اسٹیشن تیا وزیراعظم احساس پروگرام نا رداٹ زالبول ءِ روزگار فراوان کننگ کن گام گیج ستاکڑزک ہرافتا رداٹ چوری، نیزگاری و جنوزان نیاڑی تیکن پاکستان ریلوے نا غٹ اسٹیشن آتیا اسہ ہزار کھوکہ تننگک۔ یات سلے کہ پاکستان ریلوے تدوک آ مالی سال اٹی 54 ارب 59 کروڑ نا ریکارڈ ریونیو کٹیا کرینے ہرا گدرینگوک آ حکومت نا آخیری مالی سال آن 5ارب زیات ءِ۔