وزیر مملکت انسداد منشیات شہریار آفریدی نا پریس کانفرنس

اسلام آباد۔ 04جولائی (اے پی پی) وزیر مملکت انسداد منشیات شہریار آفریدی پارینے کہ ہچ گہس کانود آن ایڑتر اف، مہالو بیرہ نزور و نیزگار خلقت ءِ ہلنگاکہ داسہ بھلا مگرمچھ آتا برخلاف کارروائی مریک، منشیات نا برخلاف ننا زیرو ٹالرنس نا پالیسی ءِ۔ منشیات سوداکروک آتے عبرت نا نشانہ اس جوڑ کننگک وخت اس کہ ڈائریکٹر جنرل اینٹی نارکوٹکس فورس(اے این ایف) میجر جنرل عارف ملک پارے کہ رانا ثناء اللہ نا برخلاف غٹ ثبوت و شاہدی ساڑی ارے اونا جسمانی ریمانڈ نا گرج اف۔ پنچ شنبے نادے آ ڈائریکٹر جنرل اینٹی نارکوٹکس فورس(اے این ایف) تون اوار پی آئی ڈی ٹی پریس کانفرنس آن تران کرسا وزیر مملکت انسداد منشیات شہریار آفریدی پارے کہ منشیات نا کاروبار انسانیت کن ناسور اسے۔ ننا مسن ومارتا آخبت ءِ منشیات نا کمک اٹ بھس کننگ انگ ءِ و منشیات نا سوب آن اقوام عالم اٹی پاکستان نا ساکھ بھس مننگ ءِ۔ اوپارے کہ اقتدار نا ایوان آتے ٹی تولوک آ ک ہراتم دا دھندہ ٹی مریر تو دا قوم اکن شرف انا سوب ءِ۔ رانا ثناء اللہ نا دزگیری نا معاملہ غا شرہ چلینگ انگ ءِ، اے این ایف دا سال 1200 منشیات فروش آتے ہلک وکس اسے نا بارواٹ کس اس توار چست کتو۔ رانا ثناء اللہ نا معاملہ غا شور کروک آک 1200 دزگیری تیا انت اکن چپ ئسر۔ اوپارے کہ فیصل آباد بالی پٹ آن اسہ بندغ اس ہلنگا ہرانا منشیات نا تہہ نا و پیشن نا بھاز بھلو گروہ سے آن تعلق ءِ۔