بے پن کانود نا رداٹ بے پرخ کارروائی مننگ ءِ، وزیر مملکت حماد اظہر

آئی ایم ایف پروگرام نا ملکی معیشت آ بھاز جوان ءُ زہم اس تمک، پاکستان شونداری نا کسر آ روان مریک، ایلو جہانی ادارہ غاک ہم پاکستان ءِ فنڈ ریلیز کننگ نا چرجوئی نا بناءِ کرینو، ایشیائی شونداری بینک 3.4 ارب ڈالر ایتک
حکومت مشکل ءُ فیصلہ کننگ ءِ ولے نزور تپہ غاتا کمک ہم برجاءِ
میرات آتے پاش کننگ نا اسکیم نا بنداوی مسخت خراج تروک آتا کچ اٹ ودکی و دستاویزی معیشت ءِ مون آ دروئی ئس، اسکیم آن ریکارڈ اسہ لکھ 37 ہزار شاریک فائدہ ہرفیر، 70 ارب روپئی نا خراج دوئی مس، اسکیم آن فائدہ ہرفنگ آ حکومت الس نا منت وار ءِ
وزیراعظم نا سلاہکار خزانہ، محصولات و اقتصادی امور ڈاکٹر عبدالحفیظ شیخ نا وزیر مملکت محصولات چیئرمین ایف بی آر، سیکرٹری خزانہ و ترجمان وزارت خارجہ تون اوار پریس کانفرنس
بے پن کانود نا رداٹ بے پرخ کارروائی مننگ ءِ، وزیر مملکت حماد اظہر
اسلام آباد۔ 04جولائی (اے پی پی) وزیراعظم نا سلاہکار خزانہ، محصولات و اقتصادی امور ڈاکٹر عبدالحفیظ شیخ پارینے کہ آئی ایم ایف پروگرام نا ملکی معیشت آ بھاز جوان ءُ زہم اس تمک، معیشت سوگو مریک و پاکستان شونداری نا کسر آ روان مریک، ایلو جہانی ادارہ غاک ہم پاکستان ءِ فنڈ ریلیز کننگ نا چرجوئی نا بناءِ کریر، ایشیائی شونداری بینک پاکستان ءِ 3.4 ارب ڈالر ایتک ہرافتیان 2.1 ارب ڈالر اینخو نا سال پاکستان ءِ ملک، اولیکو پے منٹ اسہ ارب ڈالر ءِ، ہر سال پاکستان ءِ 2 ارب ڈالر ملک، مارک اپ کن فارمولہ اس جوڑ کننگانے ہرابدلینگسا کاہک ولے شرح سود 3 درسد آن کم کہول آ مریک، واپسی نا وخت 10 سال ءِ، میرات آتے پاش کننگ نا اسکیم آن اسہ لکھ 37 ہزار شاری فائدہ ہرفیر ہرا پاکستان نا تاریخ اٹی داوڑنا اسکیم تیٹی غٹ آن زیات السی اوار مننگ ءِ، اسکیم آن 70 ارب روپئی نا خراج دوئی مس۔ پنچ شنبے نادے آ داڑے وزیر مملکت محصولات حما د اظہر، چیئرمین ایف بی آر سید شبر زیدی، وزارت خارجہ نا ترجمان ڈاکٹر خاقان حسن نجیب و سیکرٹری خزانہ نوید کامران بلوچ ئسک ہم ساڑی ئسر۔ سلاہکار خزانہ پارے کہ درو بھاز جوان ءُ اہم ءُ پیش رفت اس مسنے ہراٹی جہانی مالیاتی فنڈ پاکستان کن توسیعی فنڈ فیسلٹی (ای ایف ایف) پروگرام نا منظوری ءِ تس۔ دا پروگرام اٹی پاکستان ءِ 6 ارب ڈالر نا فنڈ آسان شڑت و کم شرح سود اتون ملک۔ دا پروگرام نا ملکی معیشت آ بھاز جوان ءُ زہم اس تمک، معیشت سوگو مریک بلکن وپاکستان شونداری نا کسر آ روان مریک۔ ڈاکٹر عبدالحفیظ شیخ پارے کہ جواننگا ہیت دادے کہ آئی ایم ایف بورڈ انا دیوان اٹی غٹ باسک آک پاکستان نا مخ تفی ءِ کریر و اسہ باسک اس ہم اونا مخالفت ءِ کتو۔ نن پاکستان نا الس ءِ مبارکباد ایتنہ، نن آئی ایم ایف نا ہم منت واراُن ہرا پاکستان آ پت کرے۔ اوپارے کہ داپروگرام نا ملکی معیشت آ بھاز جوان زہم تمنگ ءِ، ایلو جہانی ادارہ غاک ہم پاکستان ءِ فنڈرز ریلیز کننگ نا چرجوئی نا بناءِ کرینو۔ ایشیائی شونداری بینک پاکستان ءِ 3.4 ارب ڈالر ایتک ہرافتیان 2.1 ارب ڈالر اینخو نا سال پاکستان ءِ ملرہ۔ ایشیائی شونداری بینک پاکستان تون پین کمکاری نا ہم سجفنگ ءِ۔ جہانی بینک اتون ہم ننا ہیت وگپ مننگ ءِ و اومیت ءِ کہ ہموکان ہم پاکستان ءِ ودکی امداد ملک۔ ایشیائی شونداری بینک و جہانی بینک انا کنڈآن پاکستان ءِ ہرا امداد ءِ تننگک، او بجٹ اٹی کمکاری کن مریک یعنی دا پروجیکٹ اسے تون منسلک مفسہ بلکن گورننس تون منسلک خڑچ آک مریرہ۔ اوپارے کہ ساڑی حکومت ءِ 31 ہزار روپئی نا وام میرات اٹ ملانو، کوشست ءِ کہ دا وام تے پدی ایتن ہراڑکن پاکستان چین، سعودی عرب، یو اے ای و قطر آن ڈپازٹ دوئی کرے۔ موخر ادائیگی تیا توانائی نا دوئی کننگ نا چرجوئی ہم بناکرینے۔ آئی ایم ایف پروگرام دالحاظ اٹ ہم اہمیت تخک کہ جہانی ادارہ غاک و جہانی برادری داڑان است جم ءُ۔ پاکستان ہم دنیا ءِ دا کلہو ءِ تننگ ءِ کہ ملک اٹی زموار حکومت جوڑ ءِ ہراخڑچ آتا مون ءِ توننگ ءِ۔ دا ہندن ءُ حکومت اسے ہرا ہزگار تپہ غاک خراج ہلیک۔ وزیراعظم نا سلاہکار پارے کہ حکومت مشکل ءُ فیصلہ کننگ ءِ ولے نزور تپہ غاتا کمکاری ہم برجاءِ۔ بجٹ اٹی نزور تپہ خاص کر حقدار زالبول آتا راجی آسراتی آ چکار کننگانے۔ نزور تپہ غاتے کن بجٹ اٹی مختص فنڈ 100 ارب آن ودفسا 191 ارب روپئی کننگانے۔ ہنداوڑ واپاری بشخ ءِ مراعات تننگ انگ ءِ۔ دا مراعات آک بجلی، گیس و وام تا سبسڈی نا دروشم اٹ ءُ۔