وزیراعظم نا سلاہکار خزانہ ڈاکٹر عبدالحفیظ شیخ نا پریس بریفنگ

اسلام آباد۔ 04جولائی (اے پی پی) وزیراعظم نا سلاہکار خزانہ ڈاکٹر عبدالحفیظ شیخ پارینے کہ آئی ایم ایف آسان شڑت و کم شرح سود اتون پاکستان کن شش ارب ڈالر نا پروگرام نا منظوری ءِ تسنے، داڑان معیشت آ جوان ءُ زہم اس تمک۔ ایلو جہانی ادارہ غاک ہم پاکستان ءِ فنڈز ریلیز کننگ نا چرجوئی نا بناءِ کرینو۔ ایشیائی شونداری بینک داسال 2.1 ارب ڈالر ایتک۔ داخیال آتا درشانی ءِ او پنچ شنبے نادے آ وزارت خزانہ ٹی پریس بریفنگ ترسا کرے۔ داوخت آ وزیر مملکت ریونیو حماد اظہر و چیئرمین ایف بی آر شبر زیدی و وزارت خزانہ نا بڑزکو کمامدارآک ہم ساڑی ئسر۔ ڈاکٹر عبدالحفیظ شیخ پارے کہ آئی ایم ایف نا پروگرام آن ملک اٹی سوگوی بریک و شونداری نا پوسکن ءُ کسر ملنگک۔ اوپارے کہ پاکستانی الس ءِ مبارکباد پیش کیوہ۔ اوپارے کہ آئی ایم ایف نا باسک آتا ہم منت واری ءِ ہرفیوہ کہ اوفک دا پروگرام نا مخالفت ءِ کتوس۔ اوپارے کہ پاکستان تحریک انصاف اقتدار ءِ سنبھالا تو ملک معاشی تنکی نا گواچی ئس۔ 31ہزار ارب روپئی ناوامک میرات اٹی ملار، داڑکن حکومت اولیتی بنداو تیا گام گیج کرینے تانکہ ملک دا تنکی آن پیش تمے۔ اوپارے کہ حکومت ءِ چین، سعودی عرب، قطر، یو اے ای آن 9.2 ارب ڈالر وام ملانے ہراڑان بھلو حد اسسکان حالیت آک جوان مسنو۔ اوپارے کہ پاکستان اسہ زموار ءُ ملک اسے و نن ویل آتیان پیش تمنگ کن گام گیج کننگ اُن۔ اوپارے کہ خراج نا نظام ءِ پین گچین جوڑ کننگ انگ ءِ تانکہ ہر بندغ ءِ ریلیف ملنگ کے۔ اوپارے کہ حکومت بجٹ اٹی شرحالی کاریم و نیزگار الس کن خصوصی زر جتا کرینے۔