وزیراعظم (اینو) باقاعدہ ڈٹ انا بناءِ کیک، بنجائی وزیر مذہبی امور پیر نور الحق قادری

اسلام آباد آن حج آ ہنوک آتا پاکستان اٹی امیگریشن نا ڈٹ روڈ ٹو مکہ آ عملدرآمد بناکرے
اسلام آباد۔ 04جولائی (اے پی پی) جہانی بالی پٹ اسلام آباد آن حج آ ہنوک آتا پاکستان اٹی امیگریشن نا ڈٹ روڈ ٹو مکہ غا عملدرآمد بناکرینے، داسال اسلام آباد بالی پٹ آ 22ہزار وخت اس کہ بروک آ سال لاہور، پشاور، کوئٹہ، کراچی بالی پٹ آتیا ہم حج آ ہنوک آتا امیگریشن مریک۔ پنچ شنبے نادے آ بنجائی وزیر مذہبی امور پیر نور الحق قادری، بنجائی وزیر ہوابازی غلام سرور خان سعودی نائب وزیر حج و عمرہ سید حسین الشریف، ڈائریکٹر جنرل امیگریشن سعودی عرب جنرل سلیمان عبدالعزیز السلیمی، سعودی عرب نا سفیر نواف سعید المالکی تون اوار جہانی بالی پٹ اسلام آباد آ روڈ ٹومکہ ڈٹ انا جاچ ءِ ہلنگ کن دورہ ءِ کریر، سعودی امیگریشن کاؤنٹر آ امیگریشن عملہ و امیگریشن کن بروک آ حج آہنوک آتون ہم اوڑدہی کریر و تروک آ آسراتی تا بابت گپ و تران کریر۔ سعودی عرب آ رادہ مروک آ اولیکو جہاز ءِ سپارنگ کن بالی پٹ لان اٹ شان و شرف دود اس اڈتننگا۔ بنجائی وزیر مذہبی امور بین المذاہب ہم آہنگی پیر نور الحق قادری دود آن تران کرسا پارے کہ پنچ شنبے آن جہانی بالی پٹ اسلام آباد آ روڈ ٹو مکہ ڈٹ بناکرینے، وزیراعظم (پگہ) جمعہ نادے آ دا ڈٹ انا باقاعدہ بناءِ کیک۔ اوپارے کہ سعودی ولی عہد محمد بن سلیمان نا دورہ پاکستان نا وخت آ وزیراعظم عمران خان نا درخواست آ انڈونیشیا و ملائیشیا غان پد پاکستان ءِ ہم اونا گل زمین آ حج آ ہنوک آتا امیگریشن نا آسراتی دوبننگ ءِ۔ اوپارے کہ سعودی حکومت باوری کرفینے کہ اسلام آباد ایئر پورٹ آ روڈ ٹومکہ ڈٹ سرسہب مننگ آ بروک آ سال پشاور، کراچی، لاہور و کوئٹہ ایئر پورٹ آتیا ہم دا آسراتی ءِ فراوان کننگک۔ اوپارے کہ اسہ لکھ 24ہزار نبی تیان گیشتر نبیک حج کریر، خواجہ محمد ﷺ ہم دا فرض ءِ سرانجام تس اوکان پد مسلمانک انبیا تا سنت ءِ ادا کننگ ءُ۔ بنجائی وزیر ہوابازی غلام سرور خان حج آ ہنوک آتے سفر حج انا بناآ مبارکباد پیش کرسا پارے کہ پاکستانی عازمین حج اسہ مقدس ءُ فرض اس سرانجام تننگ کن ہِننگ ءُ، سعودی عرب حکومت نا کنڈآن پاکستان اٹی امیگریشن نا آسراتی تننگ آ سعودی عرب حکومت نا منت واری ءِ ہرفنہ۔ اوخواست کرے کہ غٹ ایئر پورٹ آتیا روڈ ٹو مکہ ڈٹ انا رداٹ حج اکن ہنوک آتا امیگریشن ءِ کننگے تانکہ حج انا عازمین تے کن آسانی ودی مننگ کے۔ سعودی سفیر نواف سعید المالکی خادم حرمین شریفین، سعودی ولی عہد و وزارت حج و عمرہ نا کنڈآن پاکستان اٹی امیگریشن نا بنا آ مبارکباد پیش کرے۔