پاکستان اٹی فٹ بال نا شونداری کن عملی گام گیج کننگ نا گرج ءِ، چیئر مین سینیٹ محمد صادق سنجرانی

اسلام آباد۔ 03جولائی (اے پی پی) چیئرمین سینیٹ محمد صادق سنجرانی پارینے کہ پاکستان اٹی فٹ بال نا شونداری کن عملی گام گیج کننگ نا گرج ءِ، فٹ بال آن تعلقدار انتظامی معاملہ غاتے گچین کننگ تون اوار اوار جہانی کمکاری نا دوئی کننگ کن فیفا تون گچین رابطہ قائم کننگے، دا چرجوئی ٹی اسہ نمائندہ ڈل اس فیفا نا انتظامیہ تون اوڑدہی کیک تانکہ جہانی تنظیم ءِ پاکستان اٹی فٹ بال ءِ مون تروک ویل و حقی حالیت آتا بابت معلومدار کننگ مرے۔ داخیال آتا درشانی ءِ او پاکستان اٹی فٹ بال نا شونداری نا بابت سینیٹ نا خصوصی کمیٹی نا دیوان نا کماشی ءِ کرسا کرے۔ دیوان اٹی سینیٹرز ڈاکٹر اسد اشرف، مرزا محمد آفریدی، احمد خان، سینیٹر بیرسٹر محمد علی خان سیف، صدر پاکستان فٹ بال فیڈریشن اشفاق حسین شاہ، ڈائریکٹر جنرل پاکستان سپورٹس بورڈ عارف ابراہیم و فٹ بال نا بابت ایلو ادارہ غاتا نمائندہ غاک ساڑی ئسر۔ چیئرمین سینیٹ پارے کہ فٹ بال نا شونداری کن تہہ نا اختلافات آتے چٹفسا عملی گام گیج کننگے و ملک انا چندی بشخ آتے ٹی فٹ بال نا انفراسٹرکچر ءِ گچین کننگ آن بیدس فٹ بال ٹورنامنٹ اڈتننگے۔ دا چرجوئی ٹی نئے بیرہ پاکستان فٹ بال فیڈریشن و پاکستان سپورٹس بورڈ پبی کمک کے بلکن نجی بشخ انا خذمت آتے ہم دوئی کننگے۔ اوپارے کہ خصوصی کمیٹی اس جوڑ کننگ نا مسخت ہم فٹ بال نا شونداری کن غٹ تعلقدار ادارہ غاتے اسہ پلیٹ فام اسے آ یکجا کننگ نا ءِ۔۔اوپارے کہ اولیکو اولیت مچ آ ملک اٹی نجی بشخ انا کمکاری آن فٹ بال نا چندی ٹورنامنٹ آتا اڈترفنگ و سپورٹس انفراسٹرکچر نا شونداری ءِ۔ درکار فنڈ اکن نجی بشخ انا کمک ءِ دوئی کننگک۔ اوفٹ بال فیڈریشن ءِ فٹ بال ٹورنامنٹ آتا اڈتننگ کن کیلنڈر اس جوڑ کننگ و عمل نا قابل پلان اس جوڑ کننگ نا پارت کرے۔ چیئرمین سینیٹ پارے کہ پاکستان سپورٹس بورڈ ہم فٹ بال نا شونداری کن پبی کمک کے و دوئی وسیلہ غاتے کاریم اٹ اتسا فیڈریشن تون پبی کمک کننگے۔ اوپارے کہ ٹورنامنٹ آتا اڈتننگ کن پاکستان سپورٹس بورڈ گراؤنڈز آتا فراوانی و ایلو آسراتی تیکن ہروڑکمک کے۔ پاکستان سپورٹس بورڈ ءِ فٹ بال فیڈریشن ءِ دمدستی آفس اس فراوان کننگ نا پارت کننگا۔ دیوان ءِ پاننگاکہ منہ وخت مست سپریم کورٹ نا پرمان تے مون آ تخسا پاکستان فٹ بال فیڈریشن نا گچین کاری تیٹی پوسکن ءُ باڈی اس مون آ بسنے۔ صدر پاکستان فٹ بال فیڈریشن اشفاق حسین شاہ پارے کہ فیفا تون چندی معاملہ غاتیا گپ و تران مسنے ولے داوخت اسکان بھاز انگا معاملہ غاتیا پیش رفت مننگ کتنے۔ پاکستان فٹ بال فیڈریشن ءِ تینا نت تیا سلفنگ کن فنڈ انا گرج ءِ و نن گوازی تا شونداری کن عملی گام گیج چست کننگ خوانہ۔ اوپارے کہ فیفا ءِ پاکستان نا ڈغاری راستکی تا بابت معلومدار کرینن۔ داوخت آ گپ و تران کرسا سینیٹر احمد خان پارے کہ ننے تہہ نا اختلافات و دیرینہ ویل آتیان مون آ ہنسا فٹ بال نا شونداری کن گام گیج کروئی مریک۔ سینیٹر ڈاکٹر اسد اشرف پارے کہ ننے غٹ بشخ آتا سلابت اٹ آخبت نا لائحہ عمل اس جوڑ کروئی مریک۔ اوپارے کہ دا چرجوئی ٹی پاکستان سپورٹس بورڈ وپاکستان فٹ بال فیڈریشن نا نیام اٹ گچین ورکنگ ریلیشن شپ انا گرج ءِ۔ چیئرمین سینیٹ محمد صادق سنجرانی سینیٹر مرزا محمد آفریدی نا کماشی ٹی ذیلی کمیٹی اس جوڑ کرے ہرا تعلقدار ادارہ غاتا سلابت اٹ فٹ بال نا شونداری کن اِراہفتہ ٹی اسہ جامع ڈٹ اس جوڑ کیک۔ کمیٹی نا بروک آ دیوان اٹی بنجائی وزیر بین الصوبائی رابطہ آن بیدس پاکستان نا نمان کاروباری ادارہ غاتا نمائندہ غاتے بٹنگ انگک تانکہ فٹ بال نا شونداری کن گام گیج آتیا گچین پیش رفت مننگ کے۔ داوخت آ چیئرمین سینیٹ سینیٹر بیرسٹر محمد علی خان سیف ءِ وزارت بین الصوبائی رابطہ و پاکستان فٹ بال فیڈریشن تون اواری اٹ فیفا نا بابت معاملہ غاتا ایسر کننگ کن لائحہ عمل اس مرتب کننگ نا ہم پارت کرے۔