میرات آتے پاش کننگ نا اسکیم نا مد چارشنبے آ بنکنگ نا وخت و پاس آن پد چٹک
اسلام آباد۔ 03جولائی (اے پی پی) میرات آتے پاش کننگ نا اسکیم نا مد چارشنبے نادے آ بنکنگ نا وخت وپاس آن پد چٹنگ ءِ وخت اس کہ فیڈرل بورڈ آف ریونیو (ایف بی آر) شاری تے پارینے کہ اسکیم نا رداٹ میرات آتا ڈکلیئریشن آن بیدس خراج گزار زیر التواء خراج مقدمہ غاتے ہم چٹفنگ مریک۔ میرات آتے پاش کننگ نا اسکیم اٹی شاریک خصوصی است خواہی ہلکونو و داوخت اسکان 95 ہزار آن زیات خلقت اسکیم نا رداٹ درخواست تسنو۔ بنائی وڑاٹ دا اسکیم آن فائدہ ہرفنگ نا آخیریکو تاریخ 30 جون مقرر کننگاسس ولے اسکیم ٹی شاری تا است خواہی و درخواست آتا سوب آن اونا مد اٹ 3جولائی اسکان ودکی کننگا ہرا چارشنبے نادے آ بنکنگ نا وخت وپاست نا چٹنگ آن پد چٹک۔ ایسیٹ ڈکلیئریشن اسکیم نا مد انا چٹنگ آن پد ایسیٹ ڈکلیئریشن آرڈی ننس آ عملدرآمد نا بناءِ کننگک۔ فیڈرل بورڈ آف ریونیو شاری تے تاکید کرینے کہ او دا اسکیم آن فائدہ ہرفر و تینا غیر اعلانیہ و بے پاش مروک میرات و خڑچ آتا پک معلومداری ایف بی آر اسکان سرکیر۔ ایف بی آر نا رداٹ ایسیٹس ڈکلیئریشن اسکیم نا توسط آن میرات و خڑچ آتے پاش کروک آتا برخلاف ہچ ءُ کانودی کارروائی اس مفک۔ و اوفتا پاش کروک میرات آتے ہم اودیم راز اٹ تخنگک۔ ایف بی آر نا رداٹ میرات آتے پش کننگ نا اسکیم بیرہ میرات آتسکان محدود اف بلکن خراج تروک آ شاریک دا اسکیم نا رداٹ زیر التواء خراج مقدمہ غاتے ہم چٹفنگ کیرہ۔ داکان بیدس فیڈرل بورڈ آف ریونیو (ایف بی آر) نا چیئرمین سید شبر زیدی پارینے کہ میرات آتے پاش کننگ نا اسکیم اٹی داوخت اسکان 95 ہزار آن زیات شاریک تینا بے پاش مروک میرات آتے پاش کرینو۔ ”اے پی پی“ تون خصوصی گپ و تران اٹی اوپارے کہ دا اسکیم ہمو خلقت کن روشن ءُ موقع اسے ہرافک داوخت اسکان میرات آتے پاش کتنو و معمولی ءُ خراج اسے نا ادائیگی ءِ کرسا تینا میرات آتے ڈکلیئر کننگ کیرہ۔ اسہ سوج اسے آ اوپارے کہ پوسکن آ مالی سال اکن خراج آتا ہدف ءِ دوئی کننگک انتئے کہ ننا معیشت اٹی دا خہ محاصل وصول کننگ نا لائخی ارے۔ اوپارے کہ ایف بی آر اٹی آٹومیشن آ چکار کننگ انگ ءِ انتئے کہ داوخت انا گرج ءِ۔
