اسلام آباد۔ 02جولائی (اے پی پی) بنجائی کابینہ حج پالیسی 2019ء نا بابت امور آتون اوار 13اہم فیصلہ غاتا منظوری ءِ تس۔ سے شنبے نادے آ وزیراعظم نا خصوصی کمکارفردوس عاشق اعوان پریس انفارمیشن ڈیپارٹمنٹ (پی آئی ڈی) ٹی پریس کانفرنس کرسا بنجائی کابینہ نا فیصلہ غاتا بارواٹ میڈیا ءِ معلومدار کرے۔ اوپارے کہ کابینہ نا دیوان اٹی 13اہم آئٹم ایجنڈا غا ئسر ہرافتیا سیر حاصل شرہ غان پد اہم فیصلہ کننگانے ہرا ملک و قوم انا گرج ئسر۔ اوپارے کہ غٹ آن اہم فیصلہ حج پالیسی 2019 ء نا منظوری نا ءِ۔ اوپارے کہ مہالو حج فلائٹ نا روانگی وزیراعظم عمران خان اسلام آباد ایئر پورٹ آن کیک۔ پاکستانی تاریخ اٹی اولیکو وار ایئر پورٹ آ ہی امیگریشن آن پد حاجی تے رادہ کننگک۔ اوپارے کہ کابینہ ٹی وزیراعظم دا عزم انا درشانی ءِ کرے کہ ڈوہدار آتون ہچ وڑنا مفاہمت اس مننگ کپک، ڈوہدار آتا کوشست ءِ کہ وڑانا وڑاسے ٹی اوفتے این آر او ملے۔ اوپارے کہ ورناتے روزگار نا وارخواہی تا فراوانی کن پوسکن غیر روایتی وڑوڈول اختیار کننگک، سرکاری ہسپتال آتا حالیت ءِ گچین کننگ کن مخیر خواجہ غاتا کمک ءِ دوئی کننگک، پیشن نا ملک پاکستانی تے زرکاری کن غٹ آسراتی تے فراوان کننگک و پیشن نا ملک پاکستانی تا ویل آتے ایسر کننگ کن خصوصی بست و بند کننگک۔ اوپارے کہ کابینہ کمیٹی نجکاری نا 17-6-2019ء نا دیوان اٹی کروک آ فیصلہ غاتے پک کرے۔ کابینہ نیشنل کمیشن حق اطفال نا جوڑ کننگ نا ہم منظوری ءِ تسنے و وزیراعظم پارت کرے کہ گمشدہ و برمتہ مروک چناتا قومی کہول آ ڈیٹا بیس اس جوڑ کننگے۔ اوپارے کہ کابینہ سی ڈی اے نا بجٹ سال 2019-20 ء نا تخمینہ غاتا ہم منظوری ءِ تسنے و سی ڈی اے نا کنڈآن میٹرو پولیٹن کارپوریشن ءِ 16 ارب روپئی نا وام تننگانے۔ اوپارے کہ وزیراعظم اسلام آباد نا پوسکن آ ماسٹر پلان ءِ حتمی دروشم اس تننگ نا عمل ءِ زوت آن زوت پورو کننگ و سی ڈی اے نا ری سٹرکچر نگ کن زوت تجاویز پیش کننگ نا ہم پارت کرینے۔ اوپارے کہ چارشنبے آن سیاست دان تا بے پن میرات آتا ضبطگی نا عمل بناکیک۔
