اسلام آباد۔ 02جولائی (اے پی پی) الیکشن کمیشن آف پاکستان قومی اسمبلی نا باسک آتا میرات و سلوک آپیسہ غاتا سرجم آتے جاری کرے۔ الیکشن کمیشن نا کنڈآن جاری کروک سرجم حوال آتا رداٹ مسکوہی وزیراعظم و پاکستان پیپلزپارٹی نا راہشون راجہ پرویز اشرف تینا میرات آتے ٹی 28 لکھ روپئی مالیت نا کار، بینک اکاؤنٹ و نغدی تیٹی 8 کروڑ 11لکھ 53ہزار 339 روپئی، اُرائی نا پن آ ایف ایٹ اسلام آباد اٹی اُرا، میرات اٹی ملی زرعی ڈغار و اُراتے ظاہر کرینے۔ مسلم لیگ ن نا ایم این اے محسن شاہ نواز رانجھا تینا و تینا اُرائی نا پن آ مسہ کشاری ڈغار، 1 کروڑ 89 لکھ روپئی مالیت نا پرائز بانڈ ز، 5لکھ 24ہزار روپئی کیش و بینک اکاؤنٹ اٹی 29 ہزار 622روپئی ظاہر کرینے۔پی ایم ایل ق انا راہشون مونس الٰہی 11 کروڑ 76لکھ 50 ہزار روپئی مالیت نا غیر کشاری ڈغار 14 لکھ 54ہزار 63 روپئی نا کشاری ڈغار، 73 کروڑ41 لکھ 41 ہزار 285 روپئی نا زرکاری، 12کروڑ 19 لکھ 36 ہزار 139 روپئی نا ایڈوانس و قابل وصولی پیسہ غاتے ظاہر کرینے۔ اوجم وڑاٹ اسہ ارب 33 کروڑ 92لکھ 98 ہزار 26روپئی نا میرات، زرکاری و ڈغار آتے ظاہر کرے وخت اس کہ اونا اُرائی نا پن آ میرات آتا مالیت 9 کروڑ 23لکھ 22ہزار 638 روپئی ءِ۔ مسلم لیگ ن نا ایم این اے رانا ثناء اللہ خان 6 کروڑ 60 لکھ 46ہزار 523روپئی نا میرات آتے ظاہر کرینے وخت اس کہ اونا پنچ بینک اکاؤنٹ آتے ٹی 1 کروڑ 2لکھ 46 روپئی ءُ، اونا پن آ اسہ کمرشل پلاٹ نا نہاد 90 لکھ 85ہزار روپئی ءِ، زرکاری نا کچ 3 کروڑ 61 لکھ 1ہزار روپئی وخت اس کہ اوڑتون ساڑی لینڈ کروزرنا نہاد 75لکھ روپئی ءِ۔ مسلم لیگ ن نا راہشون و مسکوہی وزیراعلیٰ پنجاب میاں شہباز شریف نا میرات و واجبات آتامالیت بالترتیب 18 کروڑ 96لکھ 49 ہزار 20 روپئی و 12کروڑ 31لکھ 68 ہزار 815 روپئی ءِ۔ اونا جم اٹنگا میرات آتا مالیت 6 کروڑ 44لکھ 80 ہزار 205 روپئی ءِ۔ اونا اُرائی نصرت شہباز نا پن آ میرات آتا مالیت 23کروڑ 47 لکھ 3652روپئی و ارٹ میکو اُرائی تہمینہ درانی نا پن آ 57 لکھ 65ہزار 668 روپئی ءُ۔
