پاکستان کن یونیورسل ہیلتھ کوریج نا ماڈل نا بابت آن 2دے ئی ورکشاپ
اسلام آباد۔ 02جولائی (اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ یونیورسل ہیلتھ کوریج نا مطلب دادے کہ ہر شاری ءِ بے پرخ و مشکل آن بیدس جان جوڑی نا آب اٹ آسراتی تا فراوانی ممکن مننگ کے۔ حکومت جان جوڑی نا آسراتی تا فراوانی نا بابت جامع ڈٹ اسے آ کاریم کننگ ءِ۔ داخیال آتا درشانی ءِ او پاکستان کن یونیورسل ہیلتھ کوریج نا ماڈل نا بابت آن اِرادے ئی قومی ورکشاپ نا بنائی سیشن آن تران کرسا کرے۔ ورکشاپ ءِ اڈتننگ نا مسخت پاکستان اٹی یونیورسل ہیلتھ کوریج نا بابت پیش رفت نا جاچ ءِ ہلنگ و اودے مون آ تخسا آخبت کن لائحہ عمل اس جوڑ کننگ نا ئس۔ ڈاکٹر ظفر مرزا پارے کہ حکومت ہر تپہ غان تعلق تخوک آ شاری تے جان جوڑی نا آسراتی تا فراوانی کن گام گیج کننگ ءِ دا چرجوئی ٹی جامع ڈٹ و حکمت عملی اس جوڑ کننگ انگ ءِ۔ اوپارے کہ ہراکہول آ ہرا آسراتی تے تروئی ءِ و داڑکن انت گرج آک ءُ اوفتا جاچ ءِ ہلنگ تون اوار اوار اولیت و وسیلہ غاتا تعین ءِ ہم کننگ انگ ءِ جان جوڑی آسراتی پروگرام نا کمک اٹ راج انا نیزگار تپہ غاتے جان جوڑی نا آسراتی تا فراوانی ءِ المی کننگ انگ ءِ۔ اوپارے کہ پاکستان ہمو اولیکو ملک ءِ ہراٹی ڈی سی پی تھری نا بنداو آ یونیورسل ہیلتھ کوریج ءِ پائلٹ کننگ کن گچین کننگانے دا ڈٹ غٹ آن مست اسلام آباد اٹی بناکننگک۔ ڈاکٹر ظفر مرزامستی پارے کہ پاکستان نا ہر شاری ءِ بنداوی جان جوڑی نا آسراتی تننگ ریاست نا اولی زمواری ءِ حکومت یونیورسل ہیلتھ کوریج ءِ المی کننگ کن پرعزم ءِ، دا چرجوئی ٹی حکومت 14ملین خاہوت آتے جان جوڑی انصاف کارڈ انا کمک اٹ رکھ فراوان کننگ ءِ۔ جا ن جوڑی انصاف کارڈ انا کمک اٹ 7 لکھ 20 ہزار روپئی اسکان گچین درمان نا مفت آسراتی دوبریک، اگہ اُراسے ٹی اسہ ہندن ءُ بھلو ناجوڑی اس بریک ہراٹی است انا آپریشن ءِ کرفوئی تمک یا بک آتے ڈیلائسسز کرفوئی ءِ یا ہندن ءُ نا جوڑی ہراڑان مریض ءِ ہسپتال اٹ داخل مروئی تمک۔ بھاز انگا ناجوڑیک ءُ ہرافتا درمان بھاز کبین ءِ او خاہوت آک داکبین آ درمان نا طاقت ہم تخپسہ و بے کچ ذہنی و مالی فریشانی نا مریرہ۔ورکشاپ اٹی جان جوڑی آن تعلقدار بنجائی و صوبائی محکمہ غاک، جہانی ادارہ جان جوڑی، جان جوڑی نا بشخ اٹی کاریم کروک آ ادارہ و تعلقدار نمائندہ غاک ساڑی ئسر۔
