حکومت کشاری بشخ انا شونداری، فی ایکڑ پیدوار اٹی ودکی، بزغر تا راجی آسراتی کن 309 ارب روپئی نا کشاری ایمر جنسی پروگرام اسے نا رداٹ 13 ڈٹ آتیا کاریم کیک، دیر انا کمتی ءِ پورو کننگ کن چنکا ڈیم تا تفنگ آ 220 ارب روپئی خڑچ کننگک،
اسلام آباد۔ 02جولائی (اے پی پی) بنجائی وزیر نیشنل فوڈ سیکورٹی اینڈ ریسرچ صاحبزادہ محبوب سلطان پارینے کہ حکومت کشاری بشخ انا شونداری، فی ایکڑ پیدوار اٹی ودکی، بزغر تا راجی آسراتی کن 309 ارب روپئی نا کشاری ایمر جنسی پروگرام اسے نا رداٹ 13 ڈٹ آتیا کاریم کیک ہراڑان کشاری بشخ انا برآمد آتے ٹی ودکی مریک و نیزگاری ٹی کمتی بریک، کشاری ایمر جنسی پروگرام نا رداٹ بھلا فصل، خولم، برنج، گنڈیری، آئل سیڈز آتون اوار لائیو اسٹاک، ڈیری و فشریز نا بشخ آتا پیدوار اٹی ودکی آ چکار کننگانے، آڑھتی نا کڑد ءِ کم کننگ و مسابقتی عمل ءِ مون آ دننگ کن پوسکن ءُ منڈی جوڑ کننگ انگ ءِ، دیر انا کمتی ءِ پورو کننگ کن چنکا ڈیم تا تفنگ آ 220 ارب روپئی خڑچ کننگک، تدوک آ حکومت آک کشاری بشخ اکن فنڈ اٹی بھلو حد اسسکان کمتی کریر۔ ساڑی حکومت بروک آ منہ سال اٹی کشاری بشخ اکن خڑچ آتے ٹی ارب آ ڈالر نا ودکی کیک۔ کشاری ایمرجنسی پروگرام نا رداٹ صوبائی حکومت آتون اواری اٹ کاریم کینہ۔ بنجائی وزیر نیشنل فوڈ سیکورٹی اینڈ ریسرچ صاحبزادہ محبوب سلطان پنجاب نا وزیر کشت و کشار نعمان احمد لغاری، خیبر پختونخوا نا وزیر کشت وکشار معیب اللہ خان و پی ٹی آئی نا راہشون جہانگیر ترین تون اوار پریس کانفرنس آن تران کرسا پارے کہ وزیراعظم عمران خان کشاری بشخ انا شونداری کن خصوصی است خواہی ہلنگ ءِ۔ اوپارے کہ ہراوخت آن حکومت اقتدار اٹی بسنے، وزیراعظم جندی است خواہی ہلسا کشاری بشخ انا شونداری و گچینی کن گچین حکمت عملی نا رداٹ کاریم کننگ نا پارت کرینے۔ اوپارے کہ 309 ارب روپئی مالیت نا کشاری ایمر جنسسی پروگرام آن ظاہر مریک کہ حکومت دا بشخ انا گچینی و شونداری کن سنجیدہ گام گیج کننگ ءِ، اوپارے کہ کشاری ایمرجنسی پروگرام ءِ سرسہب کننگ کن غٹ بھلا شارتیٹی دیوان مسنے۔ دا بابت 100 آن زیات میٹنگ مسنے ہرافتے ٹی صوبائی حکومت آتون اواری اٹ لائحہ عمل اس طے کننگانے۔ اوپارے کہ مستین نا حکومت آک کشاری بشخ ءِ گوجالار و دا بشخ اکن فنڈ اٹی کمتی کریر ہراڑان دا بشخ گنجائش نا رداٹ شون ہلنگ کتو۔ داوخت آ پی ٹی آئی نا راہشون جہانگیر ترین پارے کہ ہراتم اسکان نن کشت و کشار ءِ مون آ دپنہ، کشاری بشخ شون ہلنگ کپک۔ اوپارے کہ نن اسہ کشاری ءُ ملک اسے اُن، اوکان پد ہم بھاز انگا کشاری غلہ غاتے نن درآمد کننگ اُن و تدوک آ سال 4 ارب ڈالر نا کشاری بشخ انا درآمد ات کننگانے ہراڑان ظاہر مریک کہ کشاری بشخ چکار خواہک و دا بشخ اٹی خصوصی است خواہی ہلنگ نا گرج ءِ۔ اوپارے کہ ساڑی حکومت کشاری بشخ اکن فنڈ اٹی ودکی کننگ ءِ و بروک آ پنچ سال اٹی دسا بشخ انا فنڈ اٹی نمان ودکی کینہ۔ اوپارے کہ کشاری بشخ آ چکار کپننگ نا سوب آن کشارگر آتا ہم بھاز حال خراب ءِ، اوپارے کہ ساڑی حکومت کشاری بشخ اتون اوار لائیو اسٹاک و ڈیری نا بشخ اٹی گچینی کن پرعزم ءِ ہرانا جوان ءُ بھرم اس مون آ بریک۔
