راولپنڈی۔ 01جولائی (اے پی پی) بنجائی وزیر سائنس و ٹیکنالوجی چوہدری فواد حسین پارینے کہ احتساب نا عمل اٹی ترندی بسنے اوکان پد بڑز انا کرپشن چٹا و شیفکو کہول آ اوٹی کمتی بسنے، ساڑی حکومت نا دور اٹی کرپشن نا اسہ سکینڈل اس ہم مون آ بتنے، نن اِراارب ڈالر نا تیل پیشن آن خواہفنہ، حکومت نا پالیسی ءِ درآمد آتے کم کرسا برآمد آتے ودفوئی ءِ، وزیراعظم عمران خان ہراتم سندھ انا گورنر ءِ پاہک تو سندھ اٹی ہم بدلی بریک، آصف زرداری و نواز شریف نا بورہ مافیا کشت وکشار ءِ بھس کرینو۔ داخیال آتا درشانی ءِ او دوشنبے نادے آ راولپنڈی ٹی کشاری بارانی یونیورسٹی ٹی اڈ ہلوک آ دود آن تران اٹی کرے۔ اوپارے کہ شوگر مافیا پاکستان اٹی بھلو وخت اسسکان برسراقتدار ئسر، تدوک آ حکومت آک دہ سال اٹی ہراوام تے ہلکوسر او ہرانگ ہنار، سندھ اٹی نہہ کرب ہنا ہرا دبئی و لندن آن پیش تمانو۔ اوپارے کہ دا ہیت انا خوشی ءِ کہ آصف علی زرداری ءِ اسہ پین مقدمہ (پاک لین کیس) اٹی ہم دزگیر کننگانے، تدوک آ دہ سال اٹی ہرافک کرپشن کریر غٹ جیل آتیا کارہ۔ چوہدری فواد حسین پارے کہ نواز شریف، آصف علی زرداری و چوہدری نثار مستین نا بشخ مسنو و داسہ دا ہرمسٹ نا ہچ ءُ آخبت اس اف، چوہدری نثار نا وخت داسہ ہنانے انتئے کہ سیاست اٹ ٹائمنگ اہم مریک، ہراتم سیاسی انٹری نا ٹائم ئس تو او آرام اٹ تولوک ئس۔ چوہدری فواد حسین پارے کہ ہراتم شہباز شریف لندن آ ہنا تو مریم نواز پارٹی آ کوزہ کرے، ن لیگ ءِ پِرغنگ اٹ غٹ آن اہم ءُ کڑد اس مریم نواز ادا کرے، مسلم لیگ ن آن بروک آتے آشیانہ فراوان کینہ۔ اسہ سوج اسے نا ورندی ٹی اوپارے کہ بلاول پیشن نا ملک آہنسا کرے و اودے ہم ایان علی والا اکاؤنٹ آن پیسہ ملسا کرینے۔ کراچی نا غٹ آن بھلا جماعت ایم کیو ایم آخا بلکن تحریک انصاف ءِ۔ اوپارے کہ پی ٹی آئی ساف شفاف حکومت، کرپشن نا چٹفنگ و گڈ گورننس نا وعدہ ءِ پورو کیک، پٹواری و تھانہ دار نا وڈی خوری ءِ ہم چٹفنہ، نناحکومت وعدہ غاتے اٹ اقتدار اٹی بس، گڈ گورننس کن پورو کوشست کننگ اُن ہالانکہ دا صوبہ غاتا زمواری ءِ۔ چوہدری فواد حسین پارے کہ سائنس و ٹیکنالوجی نا وزارت ءِ مہالو ہچ کس تتوکہ داسہ ہبو، نن لس بندغ نا شونداری نا کنڈا ہِننگ اُن ہراڑکن بدلی المی ءِ، تنخواک کم ئسر، سٹرکچر ءِ بدل کننگانے، فارن ریزیروز سوگو مننگ بناکرینے، برٹش ایئر ویز آن بیدس ایلو ایئر لائنک ہم پاکستان آ بننگ ءُ و نن کوشست کننگ اُن کہ پاکستان نا وسیلہ غاتے ٹی ودکی مرے، صنعت ءِ ہم جوان کننگ والااُن۔ دود انا ایسر آ یونیورسٹی انتظامیہ نا کنڈآن بنجائی وزیر ءِ سوینئر اس ہم پیش کننگا۔
