اُرائی صارف آک کل صارف آتا 75 درسد ءُ ہرافتے کن بجٹ اٹی 54 ارب روپئی نا سبسڈی تننگانے، ترجمان پاور ڈویژن
اسلام آباد۔ 01جولائی (اے پی پی) پاور ڈویژن نا ترجمان پارینے کہ 300 یونٹ کاریم اٹ اتوک آ اُرائی، 94 درسد کمرشل و زیروریٹیڈ (برآمدی)صنعتی بجلی نا صارف آتے کن بجلی نا نہاد اٹی ہچ ءُ ودکی اس کننگتنے۔ پاور ڈویژن نا ترجمان ساڑی آ نیپرا نا کنڈآن اِرا سہ ماہی ایڈجسٹمنٹس نا مد اٹی بجلی نا نہاد آتا تعین نا وضاحت ءِ کرسا پارے کہ نیپرا نا کنڈآن 1.49 روپئی فی یونٹ غٹ صارف آتے کن ودکی نا منظوری آن پد ہم 300 یونٹ کاریم اٹ اتوک آ اُرائی، 94 درسد کمرشل و زیروریٹیڈ صنعتی صارف آتے کن حکومت نا کنڈآن بجلی نا نہاد اٹی ہچ ءُ ودکی اس کننگتنے۔ حکومت پاکستان نا کنڈآن الس ءِ دا نہاد آتا ایڈجسٹمنٹ نا سوب آن اثر آتے کم آن کم کننگ کن غٹ تر کوشست آتے کننگا۔ دا کوشست آتا سوب آن کم یونٹ کاریم اٹ اتوک آ صارف آتیا ہچ ءُ ودکی بھاریم اس شاغنگ تنے۔ 300 یونٹ کاریم اٹ اتوک آ اُرائی صارف آک کل صارف آتا 75 درسد ءُ و اوفتے کن ساڑی آ بجٹ اٹی 54 ارب روپئی نا سبسڈی تخنگا تانکہ اوفتا بجلی نا نہاد ءِ ودفنگپ۔ ہندا وڑ 300 یونٹ آن زیات کاریم اٹ اتوک آ صارف آتے کن ہم حکومت نیپرا نا کنڈآن متعین کروک ودکی یعنی 1.49 روپئی نا جاگہ غا نیمہ قیمت یعنی بیرہ 75 پیسہ فی یونٹ ودکی کرینے۔ کمرشل صارف ہرافتا لوڈ 5 کلو واٹ اسکان ءِ و ہرا کل کمرشل صارف آتا 94 درسد ءِ، کن ہم ساڑی آ بجلی نا نہاد برقرار سلک و ہچ ءُ ودکی اس کننگتنے زیرو ریٹیڈ (برآمدی) صنعتی صارف آتے کن ساڑی آ 7.5 سنٹ فی یونٹ برقرار سلک۔ کشاری ٹیوب ویل آتے کن نیپرا نا تخوک آ فی یونٹ نا نہاد آن کم و ود 50 درسد کم فی یونٹ ریٹ آ بجلی فراوان کننگک تانکہ کشاری صارف آتے زیات آن زیات فائدہ ملے۔
