اسلام آباد ۔ 27جون (اے پی پی) مزن وزیر ءِ ھاسیں کمکار برائے اھوالکاری ءُُ شنگ کاری ڈاکٹر فردوس عاشق اعوان ءَ گوشت کہ اوگانستان ءِ صدر اشرف غنی ءِ پاکستان ءِ تر ءُُ تاب جوانیں رند پد ءِ نکش کنت، پڑ ءَ را ایمن جوڑ کنگ، دمگی برجائی، جیڈھ آنی گیش ءُُ گیواری ءِ واستہ ا ے تر ءُُ تاب سک باز ارزشتی انت، پاکستان ءِ الس ءُُ حکومت آں اوگانستان ءِ الس آنی واھشت، واھگ ءُُ مارشت آنی درشان ءِ واستہ مدام بے دروریں کربانی داتگ، اوگان صدر ءِ پاکستان ءِ تر ءُُ تاب ءِ ساھت ءَ دو لیکہ آنی گوشدارگ ءَ چہ ٹوھیں گامگیج پکو کنگ بنت، پاکستان ءَ بے دروریں جوزگ ءِ رد ءَ 35لکھ ءَ چہ گیش اوگان لڈ ءُُ بار کنوک آنی چار ءُُ گزار ءَ کنگ ءَ انت ۔ آ پنچ شمبے ءِ روچ ءَ راجی ھال رسانکی ادارگ ’’اے پی پی‘‘ ءَ گوں تران کنان ءَ کت آئی ءَ گوشت کہ مزن وزیر عمران خان سرج میں دگنیا ءَ پاکستان ءِ گواچنیں لکا ءَ سہرا کنگ ءُُ راجی سیت ءِ رکھینگ ءِ ھاترا کوشست کنگ ءَ انت ۔ پاکستان ءُُ اوگانستان دوئیں اسلامی ملک اَنت، اوگان الس آنی واھشت آنی رد ءَ اوگانستان ءَ ایمنی ءُُ برجائی، دو نیمگی یکوئی آناں گیش ودینگ، سیم سر آنی دوئیں نیمگ الس آنی زندمان ءِ تہ ءَ گہتری ءِ واستہ عمران خان ءِ ویژن ءِ رد ءَ اوگان صدر اشرف غنی ءِ پاکستان ءِ تر ءُُ تاب کلیتی کرد پیلو کنت ۔
