کوئٹہ۔ 25جون (اے پی پی) ڈائریکٹر جنرل قومی احتساب بیورو بلوچستان فرمان اللہ چیئرمین نیب جسٹس جاوید اقبال نا خصوصی پارت آتیا پنچ شنبے نادے 27 جون آ پیشیم نا 2بجہ غان 3بجہ نا نیام اٹ وڈی خوری نا بابت السی غاو تا بِننگ کن کھلی کچہری اس خلیک۔ وڈی خوری نا پیدواری ئِ کروک آ یا زہمی بندغ وڈی خوری نا بابت معلومداری و غاوتا پورو شاہدی اتون نیب انا ریجنل آفس اٹ ڈی جی نیب نا مون آ پیش کننگ کیرہ۔ نیب انا کانود 1999 نا دنگ اٹ بروک آ غٹ غاوتیا کانود نا رداٹ کارروائی کننگک۔ الس نا راہشونی کن معلومدار کننگ کہ ہمو ڈوک ہرا نیب انا دنگ اٹ بریرہ دُن کہ سرکاری خزانہ ئِ بندغ اس یا ادارہ سے نا کنڈآن نسخان تننگے، سرکاری واکداری نا غلط کاریم اٹ اتسا مالی فائدہ دوئی کننگ ، الس تون درو کننگ، بینک ، مالیاتی ادارہ و حکومتی سلوک آ پیسہ غاتا دانستہ عدم ادائیگی نا ارتکاب کننگ یا السی عہدیدارو سرکاری ملازم آک تینا مالی وسیلہ غاتیان بڑزکو زند اس تیر کننگ و ناروا میرات جوڑ کننگ، دُن انگا غٹ غاو تیا دمدستی گام گیج چست کننگک۔ ولے سُوالی تے پاننگانے کہ کھلی کچہری ٹی جندی وڑنا ویل آتے اتنگ نا جاگہ غا الس تون درو نا بابت کیس آتون اوار سرکاری خزانہ ئِ پُلوک آ عنصر آتا پیدواری ئِ کننگے۔ کھلی کچہری ئِ چیئرمین نیب جسٹس جاوید اقبال نا خصوصی پارت آ غٹ ریجنل آفس آتے ٹی ہر تُو انا آخیریکو پنچ شنبے آ اڈ تننگک۔ چیئرمین نیب نا پارت آتے مون آ تخسا ڈائریکٹر جنرل نیب بلوچستان فرمان اللہ پگہ پنچ شنبے نادے آ کھلی کچہری ٹی وڈی خوری نا بابت خلقت نا غاو تے بِنک۔
