کوئٹہ۔ 25جون (اے پی پی) صوبائی وزیر بلدیات سردار صالح محمد بھوتانی پارینے کہ کوئٹہ شار اٹی خصوصی ئُ سفائی مہم اس بناکننگانے ہرا 21 دے اسکان برجاسلک مہم اٹی کوئٹہ شار ئِ 4زون تیٹی بشخنگانے ، ہراٹی 400 نا خڑک کوئٹہ میٹرو پولیٹن کارپوریشن نا ملازم آک بشخ ہلنگ ئُ۔ داہیت ئِ او داڑے خصوصی سفائی مہم نا بنائِ کننگ نا وخت آصحافی تتون گپ و تران کرسا پارے ، داوخت آ ایڈمنسٹریٹر کوئٹہ میٹرو پولیٹن کارپوریشن طارق جاوید مینگل ، کوئٹہ میٹرو پولیٹن کارپوریشن نا چیف آفیسر عظیم بلوچ و ایلو آفیسر آک ہم ساڑی ئسر۔ سردار صالح بھوتانی پارے کہ کوئٹہ شار ننا غٹ انا مشترکہ اُرائِ ہرادے ساف ستھرا تخنگ کن غٹ دوئی وسیلہ غاتے کاریم اٹ اتنگک پوریا گر و شاری تے ہم بایدے مرے کہ او کچرہ تے ہرجاگہ غا خسنگ نا جاگہ غا خاص ئُ جاگہ سے ٹی مچ کیر تانکہ کوئٹہ میٹرو پولیٹن نا عملہ وخت آ اوفتے ٹھکانہ سے آ خلنگ کے۔ اوپارے کہ کوئٹہ شار اٹی تجاوزات آتا چٹفنگ کن ہم گام گیج کننگ انگ ئِ تانکہ شار انا زیبائی ئِ بحال کننگ مرے۔ اوپارے کہ وزیراعلیٰ بلوچستان و کنا جندی است خواہی ئِ کہ کوئٹہ شار ئِ ساف ستھرا کننگے ہراڑکن غٹ دوئی وسیلہ غاتے کاریم اٹ اتنگک۔ اسہ سوج اسے نا ورندی ٹی سردار صالح بھوتانی پارے کہ کوئٹہ ٹی خصوصی سفائی مہم اس بناکننگ انگ ئِ ہرا 21دے اسکان برجاسلک خصوصی سفائی مہم اٹ کوئٹہ میٹرو پولیٹن نا 400 ملازم بشخ ہلنگ ئُ و شار ئِ سفائی نا لحاظ اٹ چار زون تیٹی بشخنگانے ۔ اسہ سوج اسے نا ورندی ٹی اوپارے کہ کوئٹہ شار اٹی بناکروک آ خصوصی سفائی مہم آ ہچ ئُ ودکی فنڈ اس خڑچ مفننگ ئِ ۔ اسہ سوج اسے نا ورندی ٹی اوپارے کہ ننے فنڈ انا کمتی تون مون تروک ئِ ہراڑکن باقاعدہ چھٹی اس نوشتہ کرینن اومیت ئِ کہ فنڈ انا کمتی ئِ زوت مر کننگک۔ اسہ پین سوج اسے نا ورندی ٹی اوپارے کہ کوئٹہ میٹروپولیٹن نا ملازم آک برانز کپسہ گڑاس بندغ اوفتیان تینا جندی فائدہ غاتے کن برانز کرفیرہ ولے داسہ ملازم آتے سمامسنے او برانز کپسہ۔
