ایران اٹی ہروڑنا نزوری آن پاکستان نا سیکورٹی و اوغانستان اٹی جاری امن عمل نسخان نا سوب مریک ، بھارت سویلی ایشیا ء ٹی سٹریٹجک بریبری ءِ خراب و علاقائی سلامتی ءِ گہیو تخنگ ءِ ، اوغانستان اٹی بھارت نا ودوک آ سٹریٹجک نیام تمنگ پاکستان نا سلامتی آ بھلو زہم اس مرتب کننگ ءِ
برسلز ۔ 25جون (اے پی پی) وزیر خارجہ شاہ محمود قریشی خبڑدار کرینے کہ ایران اٹی ہروڑنا نزوری آن پاکستان نا سیکورٹی و اوغانستان اٹی جاری امن عمل آ نسخان نا سوب مریک ۔ بھارت سویلی ایشیا ء ٹی سٹریٹجک بریبری ءِ خراب و علاقائی سلامتی ءِ گہیو تخنگ ءِ ۔ اوغانستان اٹی بھارت نا ودوک آ سٹریٹجک نیام تمنگ پاکستان نا سلامتی آ بھلو زہم اس مرتب کننگ ءِ ۔ جموں و کشمیر نا جھیڑہ سویلی ایشیا ٹی پائیدار امن و سلامتی قائم مننگ نا کسر اٹ اڑاند ءِ ۔ پاکستان انسداد دہشت گردی نا بشخ اٹی تینا آزموندہ و چاہنداری تے یورپی یونین تون بشخنگ کن تیار ءِ ۔ پاکستان ءِ دہشت گردی ناخلیس آتا داسہ ہم مون تروک ءِ ہرافتے ٹی دہشت گرد آتے بنداوی وڑاٹ مالی کمک، آسراتی و ڈٹ سازی پیشن نا ملک آن ملک ۔ پاکستان پرامن و سوگو اوغانستان کن پورو وڑاٹ پرعزم ءِ ولے اوغانستان اٹی امن غٹ ملک آتا اسیجا زمواری ءِ ۔ اوغانستان اٹی پائیدار امن کن اجتماعی و تین پہ تینی وڑاٹ قابل قبول شراکت اقتدار نا فارمولہ ہی قومی سیوتی حکومت نا کسر ءِ آوار کیک ۔ اوغانستان اٹی نزوری نا پاکستان نا سلامتی و سوگوی آ براہ راست اثر تمک ۔ پاکستان امن نا گچینی و تین پہ تینی شرف ، وتواجہی نا اسہ وڑ شرف و تین پہ تینی فائدہ غاتے ٹی بھارت تون اوار غٹ ہمسایہ غاتون تعلقداری تے جوان کننگ کن پرعزم ءِ ۔ داخیال آتا درشانی ءِ او سے شنبے نادے آ برسلز اٹی یورپی یونین نا سیاسی و سلامتی کمیٹی آن تران کرسا کرے ۔ وزیر خارجہ پارے کہ پاکستان یورپی یونین و اونا باسک ملک آتون تینا تعلقداری تے بے کچ اہمیت ایتک ۔ یورپی یونین نئے بیرہ پاکستان نا اسہ روایتی ءُ حلیف اسے بلکن اسہ معاشی ءُ شریدار اس ہم ارے ۔ اوپارے کہ یورپین یونین نا بڑزکو نمائندہ فیڈریکا موغرینی و ای ’’سٹریٹجک انگیجمنٹ پلان‘‘ آ دستخط کرین ۔ ’’ایس ای پی‘‘ آن ننا تعلقداری ٹی اسہ پوسکن ءُ آب ءُ مرحلہ اس بریک و ہمہ جہت کمکاری نا فریم ورک نا کمک اٹ دا شریداری پین زیات مریک ۔ جامع سیکورٹی ڈائیلاگ نا کمک اٹ امن و سلامتی ٹی شریداری دا حکمت عملی نا بنداوی تمبہ ءِ ۔ دُن تو دا بشخ اٹی ہیت و گپ پوسکن اف و مست آن جوڑ کروک رابطہ غاتیا پوسکن ءُ وڑوڈول اس استوار کننگک ہرا زیات جامع وڑاٹ مون آ بننگ اٹ ہڑتوم آ کنڈآتا کمک ءِ کیک ۔ اوپارے کہ دنیا داوخت آ بھلو بدلی سے آن گدرینگ انگ ءِ ۔ جغرافیائی و سیاسی جھیڑہ غاک نئے بیرہ پدی بننگ ءُ بلکن دا تقسیم پین گہری مننگ ءِ ۔ دنیا نا کم و ود ہر ڈیہہ ٹی تذویراتی سوگوی خطرہ غان دوچار ءِ ، ریاست آتے ٹی تین پہ تینی پت و شرف چٹنگ ءِ ، ساڑی جھیڑہ غاک پیچیدہ تر مننگ ءُ و پوسکن آ جھیڑہ غاک مون آ بننگ ءُ ، دہشت گردی نا پوسکن آ گڑتی تیٹی ودکی مننگ ءِ ہرافتے تون ننے مہالو مون تروئی الوکہ، ’ہائی برڈ ‘ و ’سائیبر ‘ گڑتی تیان ودی مروک آ چیلنج آتا ہم ننے مون تروک ءِ و او پوسکن ءُ شکل اسے ٹی دنیا ناسلامتی کن ویل آتے ودی کننگ ءُ ۔ شاہ محمود پارے کہ جیو اکنامک دراصل اینو نا دنیا ٹی جیو پولیٹیکل و اسٹریٹجک فائدہ غاتے مشکل کننگ ءِ ، درملکی مصنوعات آتیا خراج آتا کمک اٹ ہندی صنعت آتا رکھ انا ودوک آ رجحان جہانی واپاری نظام نا اصول آتے بے اہم کننگ ءِ ۔ راج آتے ٹی ترندی اٹ بدلی و وقوع پذیر مننگ ءِ ۔ بے سگ و انتہاپسندی ودنگ ءِ ، قوم پرست و راست دُو انا واک آک طاقتور مننگ ءُ، درملکی تیان خا ر و اسلام آن خوف تہذیت آتا تصادم نا گمراہ کن نظریہ غاتے سوگوی تننگ ءِ ۔ دا غٹ رجحان آک اسیجا وڑاٹ ڈیہہ تا تہہ ٹی و اوفتا پیشن امن و سلامتی کن اسہ دمدستی ءُ خلیس اسے ۔
