کوءٹہ ۔ 25جون (اے پی پی) وزیراعلیٰ بلوچستان جام کمال خان تون صدر آزاد جموں و کشمیر محمد مسعود خان سے شنبے نا دے آ داڑے اوڑدہی کرے، صوبائی وزیر خزانہ میر ظہور احمد بلیدی و چیف سیکرٹری بلوچستان ڈاکٹر اختر نذیر ئسک ہم داوخت آ ساڑی ئسر، اوڑدہی ٹی کشمیری الس نا تحریک حق خودارادیت و تین پہ تینی است خواہی نا ایلو معاملہ غاتیا گپ و تران کننگا، آزاد کشمیر نا صدر دا وخت آ بھارت نا کوزہ نا برخلاف کشمیری تا برجا جہد و مقبوضہ کشمیر نا الس آ کروک آ بیدادی نا سرجم آتیان معلومدار کرسا پارے کہ کشمیر آن بیدس پاکستان نامکمل ءِ ، وزیراعلیٰ بلوچستان نا الس نا کنڈآن کشمیری الس تون یکجہتی نا درشانیءِ کرسا پارے کہ مچ آ قوم آنبار بلوچستان نا الس ہم تینا کشمیری ایلم تا تحریک آجوئی نا پورو مخ تفی ءِ کیرہ، اوڑدہی ٹی داہیت آ امنا کننگاکہ معاشی وڑاٹ اسہ سوگو ءُ پاکستان اس کشمیر نا ویل ءِ ایسر کننگ اٹ گچین و پبی کڑد ادا کننگ کیک، اوڑدہی ٹی معاشی ، اقتصادی و قومی شونداری نا بابت معاملہ غاتیا ہم گپ و تران کننگا و دا ہیت آ پورو امناکننگاکہ ملکی معیشت نا گچینی کن خراج نا نظام ءِ پوسکن آ وڑوڈول آتیا اتسا الس اٹ خراج نا ادائیگی نا شعور تالان کروئی مریک ، الس نا خراج تننگ آن دنیا غان امداد خواہنگ نا ضرورت مفک و قومی وقار اٹی ودکی مریک، وزیراعلیٰ پارے کہ ملک انا معاشی سوگوی کن سخت فیصلہ المی ءِ، ملکی معیشت نا گچینی کن وزیراعظم عمران خان نا پالیسی سہی سمت اٹ ءِ، اوپارے کہ خراج اصلاحات آن جی ڈی پی ٹی ودکی و خودانحصاری نا دوئی کننگ ممکن مریک ہراڑکن الس اٹ خراج نا ادائیگی نا رجحان ودی کننگ نا گرج ءِ، وزیراعلیٰ بلوچستان اٹی چندی بشخ آتا گچینی کن صوبائی حکومت نا اصلاحاتی پروگرام نا بابت پارے کہ بروک آ مالی سال انا بجٹ اٹ گورننس نا گچینی و ادارہ غاتا کاریم نا کچ اٹ ودکی کننگ تون اوار اوار معاشی سرجزآتا مون آ دننگ نا ڈٹ آک اوارو ۔ نجی بشخ انا اواری اٹ روزگار نا فراوانی نا وارخواہی تیٹی ودکی و کسب کار افرادی واک انا تیاری ہم حکومت نا اولیت آتا بشخ ءِ، اوپارے کہ صوبائی حکومت سیل و سوات و چنکا صنعت آتا مون آ دننگ کن آزاد کشمیر نا آزموندہ غاتیان فائدہ ہرفک ۔ آزاد کشمیر نا صدر صوبائی حکومت نا شونداری پالیسی و گام گیج آتا ستاءِ کرسا وزیراعلیٰ نا سرسہبی تیکن نیک است خواہی تا درشانی ءِ کرے و وزیراعلیٰ ءِ آزاد کشمیر نا دورہ نا سلہ خلک ۔
