وزیر مملکت موسمیاتی بدلی زرتاج گل نا رفاہ یونیورسٹی نا کنڈآن اڈ ہلوک آ دود آن تران

ورناتے مون آ بننگ کن جوان ئُ پلیٹ فارم اسے نا گرج ئِ، وزیراعظم عمران خان نا غٹ آن زیات چکار ورناتیاٹی ئِ
اسلام آباد۔ 25جون (اے پی پی) وزیر مملکت موسمیاتی بدلی زرتاج گل پارینے کہ ننا ورناچین مسکوہی نابود کرپٹ حکمران تا چناتیان زیات لائخ و پراعتماد ئُ، اوفتے مون آ بننگ کن جوان ئُ پلیٹ فارم اسے نا گرج ئِ، وزیراعظم عمران خان نا غٹ آن زیات چکار ورناتیا ٹی ئِ ، ملک ئِ لائخ خوانوک و لکھوک ورناتے تون اوار کسب کار بندغ آتا ہم گرج ئِ۔ سے شنبے نادے آ رفاہ یونیورسٹی نا کنڈآن اڈ ہلوک آ دود آن تران کرسا زرتاج گل پارے کہ پوسکن آ دور اٹی ہر بشخ اٹ تعلیم یافتہ انقلاب اس اتنگ اُن۔ رفاہ یونیورسٹی ملک انا گچین انگا تعلیمی ادارہ ئِ ، داکان تعلیم ئِ پورو کروک آ طالب علم آک ملک و پیشن نا ملک آتے اٹ خذمت سرانجام تننگ ئُ۔ اوپارے کہ وزیراعظم عمران خان ورناتے غٹ آن زیات تینا است انا خڑک سمجھک و اوفتا آخبت ئِ رکھ و روشنا کننگ کن خصوصی گام گیج کننگ ئِ۔ اوپارے کہ پاکستان نا ورناک ٹیلنٹ و ذہانت اٹ مچ آ دنیا ٹی تینا ہند اس تخرہ۔ زرتاج گل پارے کہ سیاست نا پڑاٹ گام ئِ تخنگ آسان ئُ کاریم اس اف داڑکن سخت حالیت و مشکل آتون مون تروئی تمک خاص وڑاٹ گچین کاری مہم اٹی نمے پنڈوک اس جوڑمرسا وونٹ خواہوئی تمک وکٹنگ آن پد السی خذمت ہی نما کاریم مریک۔ اوپارے کہ ای ورناتے مشورہ ایتیوہ ہرا سیاست نا پڑ اٹ پننگ خوارہ او الس نا خذمت نا جوزہ ئِ اتسا بریر۔ اوپارے کہ پاکستان نا تاریخ اٹی اولیکو وار ساڑی حکومت ”سٹیٹس ئِ“ پرغانے ہرانا بنداوی سوب ورناک ئُ۔ وزیر مملکت پارے کہ ننا ملک انا آبادی نا ہفت کروڑ ورناتیا تالان ئِ، ننے اوفتے ملک و قوم آ بھاریم اس کننگ نا جاگہ غا اوفتے وارخواہی فراوان کروئی مریک تانکہ او ملک و قوم انا پن ئِ روشنا کننگ کیر۔ اوپارے کہ ننا ورنا چین ئِ مون آ بننگ کن جوان ئُ پلیٹ فارم اس مہیا کننگ نا گرج ئِ۔ زرتاج گل پارے کہ ننا ملک ئِ ڈاکٹرز، انجینئر آتیانبار کسب کار بندغ آتا ہم گرج ئِ، بدبختی اٹ ننا راج اٹی ٹیکنیکل بشخ ئِ شرفدار سرپند کننگپک۔ اوپارے کہ 2022ءٹی مروک آ فیفا ورلڈ کپ اٹی قطر ئِ 10لکھ کسب کار بندغ آتا گرج ئِ و حکومت کسب کاربندغ آتے وارخواہی فراوان کننگ نا ہروڑ کوشست کیک۔ داوخت آ رفاہ یونیورسٹی نا ایگزیکٹو ڈائریکٹر انجینئر اسد اللہ خان پارے کہ ساڑی آ دور اٹی ہائیر ایجوکیشن لازم مسنے و پاکستان ئِ شون ہلوک ملک آتا سف اٹ اتنگ کن تعلیم اسٹ انگا ذریعہ ئِ۔ اوپارے کہ خواندگی نا کچ اٹ ودکی کن حکومت ئِ ٹھوس گام گیج کروئی مریک۔ دود آن سی ای او نصراللہ رندھاوا، ڈین شعبہ انجینئرنگ ڈاکٹر جمیل احمد ئسک ہم تران کریر۔ دود انا ایسر آ وزیر مملکت موسمیاتی بدلی الیکٹریکل و بائیو میڈیکل انجینئرنگ نا طالب علم آتا کنڈآن خلوک آ اسٹال نا ہم دور ہ ئِ کرے و پروجیکٹ آتا جاچ ئِ ہلک۔