اسلام آباد۔ 25جون (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ پاکستان اٹی کاروبار ئِ آسان کننگ کن پوسکن آ گام گیج آتا پروگرام پاکستان ریگولیٹری ماڈرنائزیشن اینیشی ایٹیو پوسکن آ پاکستان نا کنڈا اسہ پین پبی ئُ گام اسے۔ سے شنبے نادے آ تینا ٹویٹ اٹی اوپارے کہ وزیراعظم عمران خان کاروباری برادری، چنکا و درمیانہ صنعت آتے دفتر آتابے المی چکر آتیان بچفنگ نا نظام اس تننگ ئِ، اوفتے کرپشن فری و لال فیتہ نا اڑاند آتیان نجات ملنگ والا ئِ۔ ڈاکٹر فردوس عاشق اعوان پارے کہ دا کاروبار نا گام گیج کن پرمٹ، رجسٹریشن و موکل نامہ غاتا عمل ئِ آسان کننگ نا کنڈا اسہ اہم ئُ پیش رفت اسے، خاص کر ایس ایم ایز دا پروگرام نا بھرم تیان فائدہ ہرفک۔ اوپارے کہ دا انیشی ایٹیو حکومت نا اصلاحاتی ایجنڈا نا اہم ئُ جزو اسے۔ پیڑی تیامتکن ریگولیٹری فریم ورک اٹی بدلی اتنگ نا مسخت کاروباری تپہ کن آسانی ودی کننگ نا ئِ۔ دا گام گیج آن ملک اٹی زرکاری ئِ ہم مون آ دننگ دوئی مریک۔ انشاءاللہ پوسکن آ پاکستان نا آسانیک مچ آ قوم انا بشخ اٹ بریرہ۔
