اسلام آباد۔ 21جون (اے پی پی) وزیر خارجہ شاہ محمود قریشی پاکستان اٹی سیکورٹی ناگچین حالیت آتا سوب اقوام متحدہ نا کنڈآن پاکستان ئِ فیملی اسٹیشن اس گوندنگ نا فیصلہ نا ستائِ کرسا پارینے کہ دا پاکستان نا بھاز بھلو سرسہبی اسے ہرا جہانی ادارہ غاتا پاکستان آ پت انا درشانی ئِ، دا گام گیج نا بھاز جوان ئُ زہم اس دوئی مریک۔ دا فیصلہ غان پت سازی تون اوار اوار زرکاری ئِ مون آ دننگ رسینگک۔ اوداہیت ئِ جمعہ نادے آ میڈیا تون گپ و تران کرساپارے۔ وزیر خارجہ مخدوم شاہ محمود قریشی مستین ناحالیت آتا حوالہ ئِ ترسا پارے کہ 2008 ءٹی اسلام آباد میرٹ ہوٹل اٹ بمب دھماکہ مس ، داواقعہ نا پیش بننگ آن پد ہموڑے واقع چندی ملک آتا سفارت خانہ و اقوام متحدہ نا دفتر آتے ٹی سیکورٹی حالیت آتا بابت خاصا اضطراب ودی مسوسس ، داوڑاٹ اقوام متحدہ اسلام آباد ئِ ”نان فیملی اسٹیشن “ اس گوندا و داچرجوئی دہ سال ہندن آن ہندن ئس۔ وزیر خارجہ پارے کہ داٹی دفترخارجہ ، اقوام متحدہ تون پدریسہ رابطہ ٹی ئس ہندن کہ سیکورٹی حالیت آتے سنبھالنگ و دہشت گردی ئِ شکست تننگ اٹ ننے سرسہبی دوئی مس تو وزارت خارجہ اقوام متحدہ و اونا ایجنسی تیا زور شاغاکہ داسہ سیکورٹی نا حالیت آک گچین مسنو ہنداخاطران داسہ اقوام متحدہ ئِ تینا فیصلہ غا بایدے نظر ثانی کروئی مرے۔
