اسلام آباد۔ 21جون (اے پی پی) پاک بحریہ نا سروک ایڈمرل ظفر محمود عباسی پارینے کہ گوادر بندرگاہ تون بے پناہ سمندری وسیلہ غاک گنڈوک ئُ ہرافتیان ننے من حیث القوم فائدہ ہرفنگ نا گرج ئِ ، پاک بحریہ انفرادی وڑاٹ ایلو جہانی فوج آتون اواری اٹ دا چیلنج آتا مقابلہ ئِ کننگ نا لائخی تخک، پاک بحریہ جہانی بحری واپاری کسر تے جہانی سیوت تون اوار اوار ریجنل میری ٹائم سیکورٹی پیٹرول نا کمک اٹ سیکورٹی فراوان کننگ ئِ۔ او جمعہ نادے آ پاکستان نیوی وار کالج لاہور اٹی کورس انا بشخ ہلوک و فیکلٹی باسک آتیان تران کریکہ۔ پاک بحریہ نا ترجمان نا رداٹ پاک بحریہ نا سروک پاکستان نیوی نا بابت تینا وژن و پاکستان نیوی نا جاری ڈٹ آتے سرجمی اٹ مون آ تخسا کورس انا بشخ ہلوک آتے پنت کرے کہ تینا آخبت نا حکمت عملی کن راہشونی اسلام و نظریہ پاکستان آن دوئی کیر۔ اونظریہ پاکستان نا چندی پلو آتے تالان کرے۔ پاک بحریہ نا سروک ایڈمرل ظفر محمود عباسی پارے کہ ترندی اٹ بدلینگوک آ حالیت آتے ٹی میری ٹائم سیکٹر ئِ چندی وڑنا چیلنج آتا مون تروک ئِ۔ اوپارے کہ پاک بحریہ تینا لمہ وطن نا بحری سیم تا دفاع کن ہروخت تیار ئِ۔ داکان مست نیول چیف یات گار شہید آتیا پھل انا چادر اس شاغا و فاتحہ خوانی ہم کرے۔
