اسلام آباد۔ 21 جون (اے پی پی) بنجائی وزیر ڈٹ بندی ، شونداری و اصلاحات مخدوم خسروبختیار پارینے کہ حکومت برآمد آتے ودفنگ کن جوان ئُ گام گیج کننگ ئِ، سی پیک نا ارٹ میکو مرحلہ بناکرینے، بروک آ مرحلہ ٹی کشت وکشار و صنعتی زون آتون اوار چندی بشخ آتیا خصوصی چکار کننگک، وزیراعظم عمران خان نا حکومت چندی بشخ آتے ٹی اصلاحات کننگ ئِ، چین انا کمک اٹ ملک اٹی صنعت آتے مون آ دننگ خوانہ۔ داخیال آتا درشانی ئِ او جمعہ نادے آ سی پیک فورم آن تران اٹی کرے۔ بنجائی وزیر پارے کہ صنعتی بشخ اٹی کمکاری آن ہڑتوم آ ملک آتا تعلقداریک پین سوگو مریرہ، سی پیک نا رداٹ تین پہ تینی رابطہ غاتے مون آ دننگ دوئی مریک۔ اوپارے کہ پاک چین اقتصادی راہداری (سی پیک) بھلو ڈٹ اسے ہرانار داٹ نجی شریداری ئِ مون آ دننگ انگ ئِ۔ خسرو بختیار پارے کہ چین نا چندی بشخ آتیان کمک دوئی کینہ، پاکستان توانائی نا بھاز تنکی نا گواچی مسنے، توانائی نا گرج آک پورو مننگ اسکان معاشی شونداری ممکن اف۔ اوپارے کہ جی ڈی پی ئِ ودفنگ کن خراج نا دنگ ئِ ودفوئی مریک۔
