اقوام متحدہ۔ 21جون (اے پی پی) اوغانستان تون کمک ڈیہہ ٹی امن کن المی ئِ، ہڑتوم آ کنڈآتا سوگوی اولیت ئِ، داتُو انا ایسر اٹ اوغان صدر اشرف غنی نا دورہ اسلام آباد، واپار و توانائی ٹی ودکی کمکاری و علاقائی اقتصادی ڈٹ، علاقائی شونہالی ٹی زبردست ودکی کننگ کیک، اینو نن آخبت ئِ دااومیت اٹ ہُننگ اُن ہراڑے ننا ڈیہہ ٹی پائیدار سوگوی و سلامتی مرے، اوغانستان اٹی امن گمان آتے کن محتاط اومیت اٹ بروک آ گام گیج آتے ٹی اوغان تا نیام اٹ مذاکرات نا گرج ئِ ہرانا مسخت جنگ زدہ ملک اٹی جنگ انا چٹفنگ ئِ۔ داخیال آتا درشانیئِ اقوام متحدہ ٹی پاکستان نا سفیر ملیحہ لودھی سلامتی کونسل اٹی اوغانستان نا حالیت آتا بابت اسہ شرہ سے ٹی کرے۔ تینا تران اٹی اواوغان حکومت و طالبان تا نیام اٹ مذاکرات اٹی کمک کن پاکستان نا کوشست آتے تالان کرے و طالبان تتون اوار غٹ کڑدہ غاتیا زور شاغا کہ او امن ئِ مون آ دننگ کن عزم کیر۔ اوپارے کہ عشرہ غاتا جنگ آن پد امن گمان آتا بابت محتاط پراومیتی نا سوب آک ئُ۔ اوامریکہ و طالبان تا نیام اٹ چندی براہ راست مذاکرات نا ذکر ئِ کرے۔
