اسلام آباد۔ 20 جون (اے پی پی) وزیراعظم عمران خان آزاد جموں و کشمیر حکومت ئِ پارت کرینے کہ نیشنل ٹورازم کوآرڈنیشن بورڈ انا سلابت اٹ آزاد کشمیر اٹی سیل و سوات ئِ مون آ دننگ خاص کر دا بشخ اٹی پرائیویٹ سیکٹر نا است بڈی و زرکاری کن مفصل لائحہ عمل اس جوڑ کننگے، پیشن نا ملک آتے ٹی رہینگوک آ پاکستانیک آزاد جموں و کشمیر نا غٹ آن بھلا میرات ئُ اوفتا ویل آتا ایسری آ خصوصی چکار کننگے۔ اوداپارت آتے پنچ شنبے نادے آ آزاد و جموں کشمیر نا چندی شونداری ڈٹ، سیل وسوات ئِ مون آ دننگ و ایلو اہم معاملہ غاتیا بڑزکو کہول انا دیوان نا کماشی ئِ کرسا تس۔ دیوان اٹی وزیر امور کشمیر و گلگت بلتستان علی امین گنڈاپور ، وزیر ڈٹ بندی مخدوم خسرو بختیار، وزیر آبی و سیلہ فیصل واوڈا، سلاہکار ماحولیاتی بدلی ملک امین اسلم ، وزیراعظم آزاد جموں و کشمیر راجہ فاروق حیدر، خصوصی کمکار راجی رکھ و تخفیف غربت ڈاکٹر ثانیہ نشتر ، تعلقدار بنجائی سیکرٹریز ، چیف سیکرٹری آزاد جموں و کشمیر و ایلو سینئر آفیسر آک ساڑی ئسر۔ وزیراعظم آزاد جموں و کشمیر راجہ فاروق حیدر کشمیر نا ویل آ زور وڑاٹ جہانی کہول آ چست کننگ و آزاد جموں وکشمیر و گلگت بلتستان نا الس ئِ مون تروک ویل آتا ایسری ٹی وزیراعظم عمران خان نا جندی است خواہی و کوشست آتیا اونا منت واری ئِ ہرفے۔ اوپارے کہ جہانی کہول آ کشمیر نا ویل ئِ تالان کننگ، بھارتی جارحیت نا مقابلہ ئِ کننگ، آزاد کشمیر ئِ شونداری کونسل تون اوار چندی فورم تیٹی اوار کننگ، تعمیرو ترقی کن مالی کمک فراوان کننگ و ویل آتا ایسری نا چرجوئی ٹی بنجائی حکومت نا کمکاری نا منت وار اُن۔
