کوئٹہ۔ 20 جون (اے پی پی) صوبائی وزیر خزانہ میر ظہور احمد بلیدی پارینے کہ بلوچستان نا بروک آ بجٹ اٹی غٹ اسٹیک ہولڈر آتا سلابت ئِ اوار کننگانے، الحمداللہ 419 ارب روپئی نا الس دوست بجٹ اس پیش کننگ اٹ سرسہب مسونن اصلاحاتی گام گیج آتارداٹ بجٹ نسخان نا مون ئِ توننگ اٹ سرسہب مرینہ پوسکن آ بجٹ ئِ مستین آن اینک جوڑ کننگانے ہرانا بھرم آک براہ راست لس بندغ آ مرتب مریک بجٹ اٹی غریب بندی تا جرمانہ نا پیسہ غاتا ادائیگی کن ہم زر جتا کننگانے اسہ سد ئُ شست روپئی نا پبلک سیکٹر ڈویلپمنٹ پروگرام اٹی تعلیم و جان جوڑی تون اوار بنداوی آسراتی آ چکار کننگانے وخت اس کہ مسہ زیر التواءمیڈیکل کالج آتے کن خاطرخواہ فنڈ جتا کننگا۔ داخیال آتا درشانی ئِ او پوسٹ بجٹ پریس کانفرنس آن تران کرسا کرے، داوخت آ ترجمان حکومت بلوچستان لیاقت شاہوانی سیکرٹری خزانہ بلوچستان نورالحق بلوچ ایڈیشنل چیف سیکرٹری ڈویلپمنٹ عبدالرحمان بزدار ئسک ہم ساڑی ئسر۔ وزیر خزانہ بلوچستان میر ظہور احمد بلیدی پارے کہ پی ایس ڈی پی آن ہزار آ روزگارنا وارخواہی ودی مریک پوسکن آ بجٹ اٹی سرکاری بشخ آتے ٹی پنچ ہزار چار سد ئُ چل ئُ پنچ آسامی تخنگانے سرکاری ملازم آتا کسبی تربیت کن اسہ ارب روپئی جتا کننگانے پوسکن آ صوبائی بجٹ اٹی تنخواہ تا تناسب بنجائی حکومت نا وڑاٹ تخنگانے وزیر خزانہ پارے کہ اپوزیشن بجٹ نا مخالفت ئِ کرسا فلاحی کاریم و شونداری گام گیج آتا مخالفت ئِ کرینے برانز آن پد ننا الس دوست بجٹ ئِ خوانسا برانز کروک آ اپوزیشن باسک آک تینا رویہ غاتیا ضرور بچتائفور، اوپارے کہ بلوچستان نا جامعہ و کالج آتا گرج آتے پورو کرسا آب اٹنگا تعلیم ئِ المی کننگ اُن دا مسخت کن جامعہ غاتا بجٹ ئِ یک و نیم ارب روپئی کننگانے و صوبائی حکومت ہر ضلع ٹی یونیورسٹی کیمپس جوڑ کننگ ئِ ، اوپارے کہ لیویز و پولیس ئِ پوسکن آ وڑوڈول آتیا اتنگ نا عزم تخنہ ، سیکورٹی فورس آتا قربانی تا سوب پولیس و لیویز نا اپ گریڈیشن کننگانے امن و ایمنی آ سمجھوتہ کننگ کپنہ دا مسخت کن پین سیکورٹی بجٹ ئِ ودفوئی تما تو ودفینہ۔ مواصلاتی نظام ئِ گچین کننگ انگ ئِ تانکہ پیداواری بشخ فعال مننگ کے داوخت آ سیکرٹری خزانہ بلوچستان نور الحق بلوچ پارے کہ بلوچستان نا تاریخ اٹی راجی بشخ انا گچینی کن اولیکو مثالی ئُ بجٹ اس پیش کننگانے، 2009 آن نسخان نا بجٹ ہی برسا کرے ولے مستین نا نسبت بروک آ سال انا مالی بجٹ اٹی نسخان ئِ بھلو حد اسسکان کم کننگا بروک آ مالی سال نا بجٹ کمنٹڈ بنداوتیا ٹی ئِ ، دوئی وسیلہ غاتا رداٹ بجٹ نا جوڑ کننگ ئِ ممکن کننگانے صوبہ نا ملی وسیلہ غاتے ٹی ودکی کننگ کن جامع حکمت عملی اس جوڑ کننگانے، فنانس بل آن مالی معاملہ غاک جوان مریرہ و یونیورسز اٹی ودکی مریک اوپارے کہ مستین نا نسبت بروک آ سال انا مالی بجٹ اٹی نان ڈویلپمنٹ بجٹ ئِ کم کننگانے و داٹی ہچ ئُ پوسکن ئُ خراج اس خلنگ تنے۔ پریس کانفرنس اٹی ایڈیشنل سیکرٹری ڈویلپمنٹ عبدالرحمان بزدار پارے کہ پیداواری بشخ انا فعالیت کن بنداوی پنجر نا جوڑ کننگ المی ئِ ہندا مسخت کن صوبائی بجٹ اٹی انفراسٹرکچر نا ڈٹ آتیا چکار کننگانے۔
