کوئٹہ۔ 19 جون (اے پی پی) بلوچستان نا بروک آ مالی سال 2019-20 ءنا 419ارب روپئی آن زیات مالیت نا بجٹ پیش، بجٹ اٹی 48 ارب آن زیات نا نسخان ظاہر کننگانے، ہراٹی شونداری خڑچ آتے کن اسہ کھرب آن زیات نا زر تخنگانے، بنجاآن صوبہ نا محصولات 339 ارب روپئی مریرہ بجٹ اٹی تعلیم نا بشخ اکن غٹ آن زیات زر تجویز کننگانے وخت اس کہ داکان بیدس جان جوڑی ، امن و ایمنی ، توانائی ، آب پاشی کن ہم خاطرہ خواہ زر تخنگانے، سرکاری ملازم آتا گریڈ اسٹ آن 16کن بنجانا وڑاٹ 10 درسد ایڈہاک ریلیف، 17 آن 20 انا آفیسر آتے تنخواہ تیٹی 5 درسد ایڈہاک ریلیف تننگک کم آن کم تنخواہ نا حد ئِ 17500 مقرر کننگ نا پڑو ئِ کننگا، بروک آ مالی سال نا بجٹ ئِ صوبائی وزیر خزانہ ظہور بلیدی ایوان اٹ پیش کرے۔ بجٹ تقریر اٹی وزیر خزانہ میر ظہور بلیدی پارے کہ ساڑی صوبائی حکومت صوبہ نا طول و عرض اٹی غٹ وسیلہ غاتے کاریم اٹ اتسا الس نا راجی آسراتی ، اسہ وڑ معاشی شونداری، راجی انصاف، کانود نا بالادستی ، امن و ایمنی نا پورو بحالی، سیوت و یکجا مننگ ئِ مون آ دننگ کن ہر کہول آ گام گیج آتے عملی دروشم اس تننگ ئِ ہرانا وعدہ ئِ بلوچستان عوامی پارٹی نا منشور اٹی الس تون کننگاسس و دا عزم انا اعادہ تون کہ پین وخت اس داٹی پین وسعت اتنگک اینو آن دہ تُو مست ہراتم حکومت زمواری تے سنبھالا تو ننے میرات اٹی بے کچ نزور معیشت و مالی نسخان نا سامان کروئی تما بلاشبہ گدرینگوک آ سال مالی اعتبار اٹ حکومت کن مالی مشکل و آزمائش نا ئس حکومت ئِ 62 ارب روپئی بجٹ نسخان نا مون تروک اولی آن مسنے ہراٹی مالی سال 2017-18 ءنا غیر متوقع خڑچ آک و 12ارب نا واجبات و فاضل وصولی تا پنچ بلین روپئی و ڈرافٹ نا کمک اٹ مالی سال نا بناٹی سرانجام تننگاسس ہراڑان ساڑی حکومت ئِ مالی دباﺅ تون مون تروئی تما ولے ننا مخلوط حکومت دا مالی دباﺅ ئِ جوان وڑاٹ مون ئِ توننگ اٹ اعتدال نا درشانی ئِ کرے 2018-19 نا میزانیہ گدرینگوک آ حکومت تینا جوڑ کروک اولیت آتا رداٹ مرتکب ئس ولے نن داسال انا میزانیہ ئِ صوبہ نا جم اٹنگا شونداری واولیت آتے بنداو کرسا پیش کننگ اُن، قائد ایوان وزیراعلیٰ بلوچستان جام کمال خان نا کماشی ٹی تعلقدار محکمہ غاتا ٹیمک گدرینگوک آ مالی سال 2018-19 ءنا صوبائی شونداری پروگرام (پی ایس ڈی پی) نا خوڑتی اٹ جاچ ئِ ہلسا عدالت عالیہ بلوچستان نا فیصلہ غاتا روشنی ٹی شونداری ڈٹ آتے کن فنڈ آتا جاری کننگ ئِ المی کننگ کن گام گیج کرے ہراڑان پیدوار شونداری ڈٹ آتیا عملدرآمد بناکرینے بجٹ پیش کننگ ساڑی صوبائی حکومت نا آئینی زمواری ئِ دا بابت ساڑی حکومت نا سیوتی و اسمبلی ٹی تولوک اسمبلی نا باسک آک دا بجٹ آ تینا سلہ و شرہ غاتا کمک اٹ قائم کرسا دادے منظور کرفر ساڑی آ بجٹ بلوچستان عوامی پارٹی نا منشور و سیوتی جماعت آتا السی اومیت آتا عکاس ئِ ہراڑان بلوچستان اٹی شونداری نا عمل ئِ پین سوگوی ملک بروک آ مالی سال 2019-20 ءنا بجٹ ئِ پیش کننگ آن مست دا جوان مریک کہ ساڑی مالی سال 2018-19 نا نظر ثانی مروک بجٹ ئِ شرفدار آ ایوان نا مون آ پیش کننگے اوکان پد ای شرفدار آ ایوان ئِ ساڑی صوبائی حکومت نا پوسکن آ سال 2019-20 نا گام گیج آتا بارواٹ معلومدار کیوہ جاری مالی سال نا کل بجٹ نا بنائی تخمینہ 286بلین روپئی ئس نظرثانی مروک بجٹ سال 2018-19 نا تخمینہ 326.4بلین روپئی سلیسونے مالی سال 2018-19 ٹی پی ایس ڈی پی نا کچ 88.249 بلین روپئی ئس داٹی 1515 جاری اسکیم وخت اس کہ 3213اسکیم آک اوار ئسر مالی سال 2018-19 ٹی پی ایس ڈی پی آ نظر ثانی آن پد دانا کچ 42.248 بلین روپئی مسنے نظرثانی آن پد 1099 جاری اسکیم آتے کن 35.189 بلین روپئی و 359 پوسکن آ اسکیم آتے کن 7.059 بلین روپئی جتا کننگا بنجائی حکومت نا پی ایس ڈی پی آن صوبائی محکمہ غاتا توسط آ عملدرآمد مروک آ اسکیم و صوبائی شونداری پروگرام نا کمک اٹ چلینگوک آ ڈٹ آتا فنڈ آتا مد اٹی 6.949 بلین روپئی داکان بیدس ئُ، آئین نا آرٹیکل 119 نا رداٹ صوبہ غاتے پبلک فنانس مینجمنٹ نا کانود مرتکب کروئی ئسک ولے مسکوہی حکومت دامد اٹی ہچ ئُ گام اس چست کتو ساڑی حکومت دا رداٹ تینا آئینی زمواری تے ہر حال اٹ المی کرسا پبلک فنانس مینجمنٹ نا کانود ئِ بروک آ مالی سال اسکان مرتکب کیک مسکوہی حکومت آک بجٹ تیاری ٹی بیرہ شونداری پروگرام نا بجٹ نا ترتیب ئِ زیات فوقیت تسرہ ہراڑان مالی سال انتظامی ویل آتا مون تروک مسکہ ولے ساڑی حکومت شونداری و غیر شونداری بجٹ ئِ ترتیب تننگ کن غٹ تعلقدار محکمہ غاتا جاچ ئِ ہلنگانے وغٹ محکمہ غاتے اسہ مقررہ حد اس مختص کننگ کن فکسڈ سیلنگ تس ہراٹی محکمہ غاک تینا ساڑی آ محصولات آتے کٹیا نا تخصیصئِ اولیت ایترہ داکان بیدس حکومت خورک آسامی تے پُر کننگ کن مربوط حکمت عملی اس تینا کرینے وخت اس کہ مسکوہی دور آتے ٹی محکمہ غاتا موثر و کارکڑدگی آن بیدس بے المی آسامی تے تخلیق کننگا اوپارے کہ صوبائی کہول آ کانود سازی ٹی مناسب گام گیج چست کننگک ہژدہ می ترمیم نا اصل مسخت آتیان بہر ہ مند مننگ کے ننا حکومت چنکو وخت اسے ٹی گچین کانود سازی کرینے ہرانا تسلسل انشاءاللہ برجاسلک ، شونداری ڈٹ آتے ٹی راجی شونداری ئِ اولی فوقیت تننگانے، تعلیم، جان جوڑی ، کنوئی ئُ ساف دیر انا فراوانی، امن و ایمنی نا بحالی، پیدواری بشخ ہراٹی کشت وکشار ، لائیو اسٹاک ، ماہی گیری ، مائنز منرلز نا شونداری، آبی وسیلہ غاتا گچین کاریم اٹ اتنگ ، ڈیم تفنگ، ہن و بر کن روڈ آتا جال اس شاغنگ، انرجی، ٹرانسپورٹ ،نا آسراتی ، تیکنیکی و فنی تعلیم، کلچر و سیل و سوات ئِ مون آ دننگ ، اقلیت آتا حق و راجی رکھ انا پوروی ٹی بلوچستان عوامی انڈوونمنٹ فنڈ کون آ گام گیج آتے ٹی وسعت و ایلو اہم وڑنا حامل ڈٹ آک اوارو صوبہ ٹی کچ اٹنگا وسیلہ غاتیان پد ہم خلقت ئِ روزگار مہیا کننگ کن ننا حکومت بیرہ محکمہ تعلیم اٹی 15,998 خورک آسامی تے میرٹ آ پُر کننگ کن گام گیج چست کرینے۔
