بلوچستان اٹی اسکواش نا گوازی گرآتے پوسکن تربیت و المی آسراتی تننگ آن ننا گوازی گر آک قومی و جہانی کہول آ ملک و صوبہ نا پن ئِ روشن کننگ کیرہ، گورنر بلوچستان امان اللہ خان یاسین زئی

کوئٹہ۔ 19 جون (اے پی پی) گورنر بلوچستان امان اللہ خان یاسین زئی پارینے کہ مچ آ دنیا ٹی گوازی تے مون آ دننگ نا بابت آن پاکستان اسہ متبر ئُ پن اسے و اسکواش اٹی پاکستان نا اسہ جوان ئُ تاریخ اس مسنے۔اودایخین نا درشانی ئِ کرے کہ بلوچستان اٹی اسکواش نا گوازی گرآتے پوسکن تربیت و المی آسراتی تننگ آن گوازی گر آک قومی و جہانی کہول آ ملک و صوبہ نا پن ئِ روشن کننگ کیرہ۔ ہنداخاطران المی ئِ کہ صوبہ ٹی اسکواش نا مون آ دننگ و اونا گوازی گر آتے ہر کہول آ کمک راہشونی فراوان کین تانکہ او دنیا اسکواش اٹی پاکستان نا ہنوک آ پن ئِ دُوارہ دوئی کننگ اٹ پبی کڑد ادا کیر۔ داخیال آتا درشانی ئِ او بلوچستان اسکواش ایسوسی ایشن نا صدر محمد ارشد نا کماشی ٹی اسہ ڈل اسے تون گپ و تران کرسا کرے۔ گورنر بلوچستان اسکواش ایسوسی ایشن کوئٹہ نا پوسکن گچین مروک عہدیدار آتیا زور شاغا کہ او اسکواش نا قاعدہ و ضابطہ نا پابند مریر و پورو است جوئی اتون ایسوسی ایشن نا گرج و مسخت آتے پورو کیر۔ داکان مست گورنر اسکواش عہدیدار آتیان باقاعدہ سوغند ہلک ہرافتے ٹی صدر محمد ارشد، جنرل سیکرٹری ظفر اسلام تون اوار ایلو عہدیدار آک ہم اوار ئسر۔