اسلام آباد۔ 18 جون (اے پی پی) صدر مملکت ڈاکٹر عارف علوی پاک چین تعلقداری تے غٹ بشخ آتے ٹی پوسکن آ بڑزی تسکان دننگ نا عزم انا درشانی ءِ کرسا چین نا پیپلز لبریشن آرمی گراؤنڈ فورس انا کمانڈر جنرل ہان ویگیو ءِ ”نشان امتیاز“ (عسکری) اس تس۔ داچرجوئی ٹی سے شنبے نادے آ ایوان صدر اٹی اعزاز آتا بشخ وپانٹ نا خصوصی دود اس اڈ ہلک۔ اوکان پد جنرل ہان ویگیو صدر مملکت تون اوڑدہی کرے۔ داوخت آ صدر ڈاکٹر عارف علوی جنرل ہان ویگیو ءِ مبارکبادی ترسا ہڑتوم آ ملک آتا نیام اٹ تین پہ تینی تعلقداری تے غٹ بشخ آتے ٹی پوسکن آ بڑزی تسکان دننگ نا عزم انا درشانی ءِ کرے۔ اوپارے کہ پاکستان و چین سدابہار و آزموندہ سنگت ءُ و پاکستان چین ءِ ”آئرن برادر“ تکک۔ پاکستان نا خارجہ پالیسی ٹی پاک چین سنگتی نا اہمیت ءِ تالان کرسا صدر پارے کہ ہڑتوم آ ملک آتا نیام اٹ دفاعی و اقتصادی رابطہ ڈیہہ ٹی امن و سوگوی کن المی ءِ۔ او اینو نا دنیا ٹی ڈیجیٹل اکانومی و سائبر سیکورٹی نا اہمیت ءِ تالان کرسا سائبر سپیس اٹی مون آ بروک آ چیلنج آتون مون تننگ کن ہڑتوم آ برادر ملک آتا نیام اٹ خڑکی کمکاری نا گرج آ زور شاغا۔ صدر پارے کہ دفاع و سٹریٹجک کمکاری تذویراتی کمکار ی شریداری نا مخ انا ملی ءِ و ہڑتوم آ ملک آتا دفاعی کمامدارآک خڑکی رابطہ ءِ برجاتخانو۔ اوپارے کہ عسکری ڈل آتابڑزکو کہول انا پدریسہ ہن و بر دا رداٹ ننا کمکاری نا کلیدی پلو ءِ۔ اوہڑتوم آ ملک آتا نیام اٹ انسداد دہشت گردی کمکاری ٹی پین ودکی آ زور شاغا۔ ڈاکٹر عارف علوی پارے کہ پاکستان و چین وسیع البنداو، مریس وختی، سدابہار اسٹریٹجک کمکاری و شریداری ٹی یکجا ءُ، پاک چین معاہدہ سنگتی و کمکاری و گچین ہمسائیگی تعلقداریک دا تعلق ءِ پین گہرا کرینو۔ صدر سی پیک نا رداٹ غٹ جاری ڈٹ آتا پیش رفت آ است جمی ظاہر کرے۔ اوپارے کہ دا ڈٹ آتا پوروی آن تینا ارٹ میکو مرحلہ ٹی پترینگانے ہراٹی راجی و اقتصادی کمکاری، کشاری شونداری، نیزگاری نا چٹفنگ و صنعتی کمکاری آ چکار ءِ۔ اوپارے کہ چینی شاری تا رکھ و سلامتی پاکستان نا اولیت ءِ۔ اوداہیت ءِ تالان کرے کہ پاکستان نا حکومت چینی شاری تا رکھ اکن بنجائی و صوبائی حکومت آتا اوار مننگ و سول عسکری سیکورٹی ادارہ غاتون اواری اٹ کثیر الجہتی سیکورٹی بست و بند کرینے۔ جنرل ہان ویگیو نشان امتیاز (عسکری) اس تننگ آ صدر مملکت نا منت واری ءِ ہرفے۔
