پاکستان جہانی بینک انا پت انا قابل شریدار ءِ، جہانی بینک انا اقتصادی پروگرام آن پاکستان نا اقتصادی و راجی شونداری ٹی پین گچینی بریک، وزیراعظم نا سلاہکار خزانہ و اقتصادی امور ڈاکٹر عبدالحفیظ شیخ نا پاکستان و جہانی بینک انا نیام اٹ معاہدہ غاتیا دستخط آن پد میڈیا تون گپ و تران

اسلام آباد۔ 18جون (اے پی پی) وزیراعظم نا سلاہکار خزانہ، محصولات و اقتصادی امور ڈاکٹر عبدالحفیظ شیخ پارینے کہ پاکستان جہانی بینک انا پت انا قابل شریدار ءِ۔ سے شنبے نادے آ داڑے پاکستان وجہانی بینک انا نیام اٹ 918 ملین ڈالر نا مسہ معاہدہ غاتیا دستخط آن پد میڈیا تون گپ و تران کرسا اوپارے کہ پاکستان و جہانی بینک انا نیام اٹ پت انا قابل شریداری ءِ، جہانی بینک پاکستان نا پت انا قابل شریدار ءِ۔ اوپارے کہ جہانی بینک پاکستان نا اقتصادی شونداری ٹی بھلو وخت اسے آن کاریم کننگ ءِ، جہانی بینک انا اقتصادی پروگرام آن پاکستان نا اقتصادی و راجی شونداری ٹی پین گچینی بریک۔ جہانی بینک انا کنٹری ڈائریکٹر پیچ موتو الانگ وان داوخت آ گپ و تران کرسا پارے کہ پاکستان و جہانی بینک انا کمکاری نا چرجوئی برجاءِ۔ اوپارے کہ ہرا مسہ معاہدہ غاتیا دستخط مسنے دا ہندن ءُ بشخ ءُ ہراٹی پاکستان نا حکومت تینا خلقت آ زرکاری کننگ ءِ و ہراٹی پاکستان اپرمڈل انکم ملک مننگ نا کسر آ روان مریک۔ اوپارے کہ ننے اومیت ءِ کہ دا پروگرام تیا عملدرآمد کروک آ ایجنسیک جوان وڑاٹ کاریم ءِ المی کیرہ ہراڑان دا معاہدہ غاتا ہدف آتے دوئی کننگ اٹ المی وڑاٹ کمک رسینگک۔