بجٹ ءِ منظور مننگ کن الیپننگ نا پڑو ءِ کروک آک بنجا و صوبہ غاتا شونداری کن سنجیدہ افس
اسلام آباد۔ 18 جون (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ بجٹ ءِ منظور مننگ کن الیپننگ نا پڑو ءِ کروک آک بنجا و صوبہ غاتا شونداری کن سنجیدہ افس، حکومت سندھ اکن مستین نا مقابلہ ٹی 200 ارب روپئی ودکی تخانے، بلوچستان و خیبر پختونخوا ٹی اوار مروک آ قبائلی ضلع غاتا شونداری ءِ خاص اولیت تننگانے، اپوزیشن باسک آک بجٹ ءِ بنگر نا خوانار، ولدا ہرا بنداو آ اودے الس دشمن گوندنگ ءُ۔ سے شنبے نادے آ تینا ٹویٹ اٹی اوپارے کہ ملکی معیشت ءِ بھس کاری نا جاگہ غا سرکروک آک داسہ الس نا پین انت اکن تیل ءِ کشنگ خوارہ، نومولود سیاستدان سیاسی بلوغت آن عاری ءُ، اوفتے دا ادراک اف کہ دا بجٹ سندھ اتون اوار غٹ صوبہ غاتا الس نا حق آتا رکھ انا ضامن ءِ، سندھ انا بجٹ نا مقدر ہندا بنجائی بجٹ تون گنڈوک ءِ، عمران خان نا عداوت اٹی سندھ انا الس تون دشمنی کپس۔ پاکستان تحریک انصاف نا حکومت سندھ اکن مستین نا مقابلہ ٹی کم و ود 200 ارب روپئی ودکی تخانے۔ اوپارے کہ تدوک آ مالی سال اٹی این ایف سی نا رداٹ 616ارب روپئی نا مقابلہ ٹی اینخو نا مالی سال اٹی سندھ اکن 815 ارب روپئی جتا کننگانے، دا حکومت نا بنجا پاکستان نا اکائی تے اہمیت تننگ نا شاہدی ءِ۔ اوپارے کہ بنجائی بجٹ اٹی بلوچستان و خیبر پختونخوا ٹی اوار مروک آ قبائلی ضلع غاتا شونداری ءِ خاص اولیت تننگانے، بجٹ ءِ منظور مننگ کن الیپننگ نا پڑو ءِ کروک آک بنجا و صوبہ غاتا شونداری کن سنجیدہ افس، ہرا سیاسی جماعت آک گچین کاری تیٹی شکست کنوک مولانانا خذمت ءِ ہلنگ ءُ، داڑان اندازہ مریک کہ الس اوفتے تون تفوک اف۔
