اسلام آباد۔ 18 جون (اے پی پی) بنجائی وزیر ہوابازی غلام سرور خان پارینے کہ شام و پاکستان نا نیام اٹ ہوابازی بشخ ءِ پین سوگو کننگ نا بے پناہ گنجائش ارے، شام انا ایوی ایشن پاکستان اٹی آپریشن نا بناءِ کننگ نا خواہش ظاہر کرینے، شام انا نجی ایئر لائن ”شام ونگ“ A 320 جہاز انا مسہ پرواز دمشق۔ کراچی۔ دمشق روٹ آ بناکننگ خواہک۔ او سے شنبے نادے آ شام انا سفیر ردوان لوطفی تون اوڑدہی ٹی گپ وتران کریکہ۔ شام انا سفیر بنجائی وزیر ءِ پارے کہ شام مذہبی زیارت آتے کن بھاز اہم ءِ، کم و ود 25آن 30 ہزار پاکستانی زائر شام آ بریرہ ولے پاکستان و دمشق نا نیام اٹ براہ راست بال کروک ءُ جہاز اف۔ اوپارے کہ شام اٹی ویزاآن اراایول ہم تننگک ہنداخاطران پاکستان و شام انا نیام اٹ براہ راست پرواز بایدے بناکننگے، دا بال کروک آ جہاز آک کراچی و دمشق نا نیام اٹ بایدے بناکننگر۔ بنجائی وزیر ہوابازی غلام سرور خان شام انا سفیر ءِ پارے کہ فروری 2019 ء ٹی ایوی ایشن ڈویژن ءِ شام انا سول ایوی ایشن اتھارٹی نا کنڈآن شام ونگ ہراکہ اسہ پرائیویٹ ءُ شامی ایئر لائن اس پاکستان اٹی آپریشن بناکننگ نا خواہش ظاہر کرینے، شام ونگ مسہ پرواز دمشق کراچی دمشق روٹ آ بناکننگ خواہک، دا چرجوئی ٹی او 320 جہاز ءِ کاریم اٹ اتنگ خواہک، ایوی ڈویژن غٹ اسٹیک ہولڈرآتون ہیت کرسا فیصلہ کیک۔
