اسلام آباد ۔ 17 جون (اے پی پی) مزن وزیر عمران خان ئَ اسمبلی ئِ باسک آناں بجٹ ئِ منظوری ئِ کار ئَ جوانیں کرد ئِ پیلو کنگ ئِ گوشت کہ بجٹ ئِ سر ئَ سر ئَ باست ئُُ واست ئِ ساھت ئَ اپوزیشن ئِ نیمگ ئَ اسمبلی ئِ کاروائی ئَ پہ زانت پینگ جنگ ئِ کوشست اپسوزی انت۔ اے گپ آئی ئَ دو شمبے ئَ ادا پارلیمانی پارٹی ئِ دیوان ئَ گشتانک ئِ ساھت ئَ گوشت۔ اے دیوان پارلیمنٹ گس ئَ برجم دارگ بوت۔ مزن وزیر ئَ گوشت کہ استیں حکومت ئَ وتی سروکی ئِ زمانگ ئَ اولی دھ ماھ آنی تہ ئَ مشکلیں ساھت ئُُ کترہ گوازینتگ اَنت۔ آئی ئَ گوشت کہ پاکستان تحریک ئِ انصاف ئَ وھد ئِ حکومتی تگ ئُُ تاچ وتی کوپگاں زرتگ گڈا ملک ھراب تریں مشکل آں گوں آماچ بوتگ، مشکلیں جاور آنی تہ ئَ متحدہ عرب امارات، سعودی عرب ئُُ چین ئِ وڑیں دوستیں ملک آنی نیمگ ئَ کمک کنگ ئِ پد ئَ شگر ئُُ منت وار آں۔ آئی ئَ گوشت کہ راج وام آنی چیلگ ئَ بند کنان ئَ زاتی تجوری آناں پُر کنوک راجی مجرم انت ایشانی گوما مجرم رنگیں سلوک کنگ لوٹ ایت، پاکستان ئِ الس ئَ پی ٹی آئی ئَ را ھاٹیگ داتگ، ڈنگ آنی ھلاپ ئَ پکوئیں جنگ کنگ ئِ مینڈیٹ داتگ۔ مزن وزیر ئَ گوشت کہ حکومت ئِ کوشست آنی سبب ئَ معاشی برجائی اتکگ۔
