اسلام آباد۔ 17 جون (اے پی پی) اسپیکر قومی اسمبلی اسد قیصر تون ایرانی مجلس شوریٰ نا ڈل ڈاکٹر احمد امیر بادی فراھانی نا کماشی ٹی دوشنبے نادے آ پارلیمنٹ ہاؤس اٹی اوڑدہی کرے ہراٹی ہڑتوم آ کنڈآتا تعلقداری، ڈیہہ نا سیاسی حالیت آتون اوار تین پہ تینی است خواہی نا ایلو معاملہ غاتیا گپ و تران کننگا۔ داوخت آ ڈل اتون گپ وتران کرسا اسپیکر اسد قیصر پارے کہ پاکستان و ایران مذہب، اخوت، دودوربیدگ، تاریخ و ہمسائیگی نا رشتہ غاتے ٹی گنڈوک ءُ۔ اوپارے کہ پاکستان ایران تون تینا خڑکی دوستانہ تعلقداری تے بھاز اہمیت ایتک۔ پاکستان پارلیمانی و اقتصادی رابطہ غاتے مون آ درسا ایران تون ساڑی آ تعلقداری تے پین ودفنگ خواہک۔ ہڑتوم آ ملک آتا پارلیمنٹ نا باسک آک ہڑتوم آ قوم تے خڑک اتنگ اٹ اہم ءُ کڑد اس ادا کننگ کیرہ۔ پاکستان غٹ ہمسایہ ملک آتون بریبری نا کہول آ خوشگوار تعلقداری خواہک، ڈیہہ نا شونداری و شونہالی و سوگوی کن ہڑتوم آ ہمسایہ ملک آتے ٹی خڑکی کمکاری المی ءِ۔ پاکستان ایران تون غٹ راجی و معاشی بشخ آتے ٹی کمکاری ءِ مون آ دننگ نا خواہندار ءِ۔ پارلیمانی سفارتکاری ہڑتوم آ برادر اسلامی ملک آتے ٹی تعلقداری تے سوگو کننگ اٹ اہم ءُ کڑد اس ادا کننگ کیک۔ ایران پاکستان تون تینا تعلقداری تے قدر انا نظر اٹ ہرک۔ احمد امیر بادی فراھانی اسپیکر قومی اسمبلی تون گپ و تران کرسا پارے کہ ایران ڈیہہ ٹی امن کن پاکستان ءِ تینا شریدار سرپند کیک۔ اوپارے کہ ڈیہہ ٹی سلامتی، علاقائی شونداری و معاشی سوگوی کن ہڑتوم آ ملک آتا پارلیمان تیٹی خڑکی کمکاری المی ءِ۔ ایران نا سرکڑدہ ہی و حکومت ہڑتوم آ کنڈآتا تعلقداری تے پین سوگو کننگ نا است خواہ ءِ۔ دہشت گردی ڈیہہ نا شونداری کن بھلو گڑتی اسے داڑتون مون تننگ کن اسیجا کوشست آتا گرج ءِ۔
