بنجائی وزیر ریلوے شیخ رشید احمد تون اوڑدہی ٹی جاپان نا سفیر گونینوری متسودا نا گپ و تران

جاپان پاکستان ریلوے ٹی شریداری نا است خواہ ءِ
پاکستان ریلوے علاقائی شونداری کن وسط ایشیائی ملک و یورپی ملک آتے ریل انا کمک اٹ ملفنگ کن گام گیج کننگ ءِ، شیخ رشید احمد
اسلام آباد۔ 17 جون (اے پی پی) بنجائی وزیر ریلوے شیخ رشید احمد تون جاپان نا پاکستان اٹی سفیر کونینوری متسودا دوشنبے نادے آ داڑے اوڑدہی کرے۔ اوڑدہی ٹی پاکستان وجاپان نا نیام اٹ ریل بشخ اٹی کمکاری ءِ ودفنگ آ گپ و تران کننگا۔ وزیر ریلوے جاپان ءِ راولپنڈی، لاہور و کراچی، حیدر آباد نا نیام اٹ ہائی سپیڈ ریل چلیفنگ نا ڈٹ اٹی شریدار نا سلہ خلک۔ وزیر ریلوے شیخ رشید احمد پارے کہ پاکستان ریلوے ٹی جاپانی زرکاری و شریداری ءِ بخیر اٹ پاہک۔ اوپارے کہ پاکستان ریلوے جاپانی ٹیکنالوجی و چاہنداری آن فائدہ ہرفنگ نا است خواہ ءِ، علاقائی شونداری کن پاکستان ریلوے وسط ایشیائی ملک و یورپی ملک آتے ریل انا کمک اٹ ملفنگ کن گام گیج کننگ ءِ۔ اوجاپانی سفیر ءِ پارے کہ پاکستان ریلوے گوادر، کوئٹہ، تفتان ریل نیٹ ورک اس جوڑ کننگ ءِ۔ اوپارے کہ جاپانی کمپنی، ریلوے لوکوموٹو فیکٹری رسالپور، کیرج فیکٹری اسلام آباد اٹی شریداری نا زبردست وارخواہی تیان فائدہ ہرفر۔ داوخت آ گپ و تران کرسا جاپانی سفیر پارے کہ پاکستان وجاپان نا نیام اٹ تعلقداریک تاریخی ءُ، واپار و معاشی تعلقداری تے پوسکن آ بڑزی تسکان دننگ مریک، پاکستان تون کمکاری ءِ مون آ دینہ۔ اوپارے کہ جاپان پاکستان ریلوے ٹی شریداری نا است خواہ ءِ، پوسکن آ ڈٹ آتیان ریلوے ٹی جدت بریک۔