الیکشن کمیشن مسلم لیگ ن نا نائب صدر مریم نواز شریف نا پارٹی عہدہ غان نابودی نا بارواٹ درخواست نا سماعت ءِ 25جون اسکان پد بٹے

مریم نواز شریف نا برخلاف پٹیشن نا کاپی اس اونا وکیل آتا دوٹی تننگ نا پارت
اسلام آباد۔ 17 جون (اے پی پی) الیکشن کمیشن مسلم لیگ ن نا نائب صدر مریم نواز شریف نا پارٹی عہدہ غان نابودی نا درخواست نا سماعت ءِ 25جون اسکان پد بٹے وخت اس کہ مریم نواز شریف نا برخلاف پٹیشن نا کاپی اس اونا وکیل آتا دوٹی تننگ نا پارت ءِ۔ دوشنبے نادے آ چیف الیکشن کمشنر جسٹس (ر) سردار محمد رضا نا کماشی ٹی بنچ تحریک انصاف نا زالبول باسک آتا کنڈآن مریم نواز شریف نا مسلم لیگ ن نا نائب صدر نا عہدہ غا تعیناتی نا برخلاف درخواست نا سماعت ءِ کرے، مریم نواز شریف نا کنڈآن بیرسٹر ظفر اللہ خان وخت اس کہ مسلم لیگ ن نا کنڈآن جہانگیر جدون کمیشن نا مون آ پیش مسر۔ چیف الیکشن کمشنر داوخت آ سوج کرے کہ مریم نواز شریف و ن لیگ انا ورندی ہراڑیکن ءِ ہراڑا مریم نواز شریف نا وکیل پارے کہ اودے پٹیشن نا کاپی اس تننگتنے، دا کاپی ءِ تننگے تو ورندی ءِ جمع کرفینہ ہراڑا الیکشن کمیشن مریم نواز شریف نا وکیل آتے پٹیشن نا کاپی اس تننگ نا پارت کرسا سماعت ءِ 25جون اسکان پد بٹے۔